ප්රමුඛ පෙළේ කෘත්රිම බුද්ධි (AI) සමාගමක් වන ඇන්ත්රොපික් ආයතනය “සැපයුම් දාම අවදානමක්” ලෙස නම් කරමින් ට්රම්ප් පරිපාලනය පැනවූ තහනමට එරෙහිව එම සමාගම අධිකරණයේදී මූලික ජයග්රහණයක් අත්කර ගෙන තිබේ. උතුරු කැලිෆෝනියා දිස්ත්රික් විනිසුරු රීටා එෆ්. ලින් (Rita F. Lin) විසින් රජයේ නියෝගයට එරෙහිව වාරණ නියෝගයක් නිකුත් කරමින් ප්රකාශ කළේ, ඇමෙරිකානු සමාගමක් රජයේ මතයට එකඟ නොවීම නිසාම එය “සතුරු හෝ විනාශකාරී” ආයතනයක් ලෙස හංවඩු ගැසීමට කිසිදු නීතිමය පදනමක් නොමැති බවයි.
ඇන්ත්රොපික් සමාගම සිය ‘ක්ලෝඩ්’ (Claude) AI මාදිලිය මනුෂ්ය අධීක්ෂණයකින් තොරව මාරක ස්වයංක්රීය ආයුධ සඳහා භාවිත කිරීම සහ ඇමෙරිකානු පුරවැසියන් සමූහ වශයෙන් නිරීක්ෂණය (Mass surveillance) කිරීම සඳහා යොදා ගැනීමට අවසර දීම ප්රතික්ෂේප කර තිබුණි. මෙයට ප්රතිචාරයක් ලෙස පසුගිය පෙබරවාරි මාසයේදී ජනාධිපති ට්රම්ප් සහ ආරක්ෂක ලේකම් පීට් හෙග්සෙත් විසින් එම සමාගම ජාතික ආරක්ෂාවට තර්ජනයක් ලෙස නම් කරමින් සියලුම ෆෙඩරල් ආයතනවලට ඔවුන්ගේ තාක්ෂණය භාවිත කිරීම තහනම් කරන ලදී.
විනිසුරු ලින් පෙන්වා දුන්නේ මෙම පියවර සමාගම අඩපණ කිරීමට සහ මහජන මතය මර්දනය කිරීමට ගත් උත්සාහයක් බවයි. මෙය ඇමෙරිකානු ආණ්ඩුක්රම ව්යවස්ථාවේ පළමු සංශෝධනය (First Amendment) යටතේ සහතික කර ඇති භාෂණයේ නිදහසට එරෙහිව සිදු කළ පලිගැනීමක් ලෙස ඇය හැඳින්වීය. විශේෂයෙන්ම විදේශීය සතුරන් ඉලක්ක කර ගනිමින් භාවිත කරන දුර්ලභ හමුදා බලතල මෙලෙස ඇමෙරිකානු සමාගමකට එරෙහිව භාවිත කිරීම අත්තනෝමතික ක්රියාවක් බව ඇය වැඩිදුරටත් සඳහන් කළාය.
මෙම නියෝගයත් සමඟ නඩුව අවසන් වන තෙක් රජයේ ආයතනවලට සහ ආරක්ෂක දෙපාර්තමේන්තුව සමඟ කටයුතු කරන බාහිර සමාගම්වලට ඇන්ත්රොපික් තාක්ෂණය තවදුරටත් භාවිත කිරීමට අවස්ථාව හිමි වේ.
