මඩකලපුව ප්රදේශයේ කාන්තාවන් සතු රන් භාණ්ඩ කොල්ලකා ඔවුන්ව පාළු ළිඳකට දැමීමේ අමානුෂික සිද්ධිය සම්බන්ධයෙන් සිදුකරන විමර්ශනවලදී ඉතා වැදගත් කරුණු රැසක් අනාවරණය කර ගැනීමට පොලීසිය සමත්ව තිබේ. මෙම සිද්ධියට අදාළව දැනට සැකකරුවන් තිදෙනෙකු අත්අඩංගුවට ගෙන රඳවා තබාගෙන ප්රශ්න කරමින් සිටින අතර, ඔවුන්ගෙන් හෙළි වූ තොරතුරුවලට අනුව ඊයේ (26) රාත්රියේදී නිර්වින්දන උපකරණයක් සහිතව 37 හැවිරිදි ත්රීරෝද රථ රියදුරෙකු ද අත්අඩංගුවට ගෙන ඇත.
සැකකරුවන්ගෙන් ප්රශ්න කිරීමේදී අනාවරණය වී ඇත්තේ, වින්දිත කාන්තාවන් පැහැරගෙන ගොස් ඔවුන් මත් කිරීම සඳහා ශල්යකර්ම සඳහා භාවිත කරන විශේෂ නිර්වින්දන ඖෂධ (Anaesthetic drugs) භාවිත කර ඇති බවයි. මේ සඳහා ඔවුන් විසින් විශේෂිත ඉසින යන්ත්රයක් (Spray machine) භාවිත කර ඇති බවද පොලීසිය පවසයි. පසුගිය මාර්තු 19 වනදා වවුනතිව් ප්රදේශයේ සිට මඩකලපුව බලා ගමන් ගත් තරුණ මවක් සහ ඇයගේ අවුරුදු දෙකහමාරක දරුවා අතුරුදන් වීමත් සමඟ මෙම සිද්ධිය පිළිබඳව මුලින්ම වාර්තා විය. පසුව එම මව පාළු ළිඳක දමා සිටියදී බේරාගත් අතර, ඇයගේ දරුවා අසල වෙල්යායක සිටියදී සොයාගන්නා ලදී. කෙසේ වෙතත්, එම ළිඳ තුළම තිබී තවත් කාන්තා මළ සිරුරක් ද හමුවීමත් සමඟ මෙම සංවිධානාත්මක අපරාධ කල්ලිය පිළිබඳව තොරතුරු අනාවරණය විය.
මෙම අපරාධ කල්ලිය විසින් සොරා ගන්නා ලද රන් භාණ්ඩ මිලදී ගත් ස්වර්ණාභරණ සාප්පු හිමියන් දෙදෙනෙකු ද පොලිස් භාරයට ගෙන තිබේ. විමර්ශන අතරතුර අපරාධ සඳහා යොදාගත් ත්රීරෝද රථ දෙකක්, මෝටර් රථයක්, පොරවක් සහ තියුණු ආයුධ කිහිපයක් ද සොයා ගැනීමට පොලීසිය සමත් විය. මෙම කල්ලිය විසින් තවත් මෙවැනි පැහැරගැනීම් සිදු කර ඇත්ද යන්න සහ නිර්වින්දන ඖෂධ ඔවුන් ලබාගත් ආකාරය පිළිබඳව මඩකලපුව පොලීසිය වැඩිදුර විමර්ශන පවත්වයි.
