එළඹෙන යල කන්නය සඳහා ප්රමාණවත් පරිදි පොහොර සංචිත පවතින බව පවසමින් රජය සහ මාලිමා දේශපාලන නායකයන් ගොවි ජනතාව නොමඟ යවන බවට ජාතික ගොවිජන එකමුතුවේ සභාපති අනුරාධ තෙන්නකෝන් මහතා චෝදනා කරයි. අනුරාධපුරයේදී අද (27) පැවැති මාධ්ය හමුවකදී අදහස් දක්වමින් ඔහු අවධාරණය කළේ, පවතින සැබෑ පොහොර තොග පිළිබඳ විනිවිදභාවයකින් යුත් වාර්තාවක් වහාම රටට හෙළි කළ යුතු බවයි. අසත්ය ප්රකාශ මඟින් ගොවීන් රවටා වගා කටයුතු ආරම්භ කිරීමට පෙළඹවීමෙන් පසු පොහොර හිඟයක් ඇති වුවහොත් එහි වගකීම රජය භාරගත යුතු බව ඔහු පෙන්වා දුන්නේය.
රජයේ මෙම “අසත්ය ප්රචාර” හේතුවෙන් ගොවීන් යම් හෙයකින් අපහසුතාවට පත් වුවහොත්, දිවයින පුරා සිටින ගොවි ජනතාව ඒකරාශී කරමින් මාලිමා නායකයන්ගේ නිවාස වටලෑමට පසුබට නොවන බවට ද තෙන්නකෝන් මහතා මෙහිදී දැඩි අනතුරු ඇඟවීමක් කළේය. පවතින ආර්ථික අර්බුදය හමුවේ ගොවියා තවදුරටත් අසරණ නොකර, යල කන්නයට අවශ්ය පොහොර සහ සහනාධාර නිසි පරිදි ලබා දීමට කටයුතු කරන ලෙස ඔහු බලධාරීන්ගෙන් ඉල්ලා සිටියේය. ගොවි ජනතාව මේ වන විටත් දැඩි පීඩනයකින් පසුවන බැවින්, දේශපාලන වාසි තකා ඔවුන්ගේ ජීවනෝපාය සමඟ සෙල්ලම් නොකරන ලෙස ද ඔහු රජයට මතක් කර දුන්නේය.
