ශ්රී ලංකාව තුළ දැනට ක්රියාත්මක ඉන්ධන QR කේත ක්රමවේදය වඩාත් කාර්යක්ෂම කරමින් එහි ඵලදායිතාව ඉහළ නැංවීම පිළිබඳ විශේෂ සාකච්ඡාවක් ඊයේ (27) බලශක්ති අමාත්යාංශයේදී පැවැත්විණි. මෙම සාකච්ඡාවේ ප්රධාන අරමුණ වූයේ පද්ධතිය ආශ්රිතව දැනට මතු වී ඇති තාක්ෂණික ගැටලු නිරාකරණය කිරීම සහ පවතින තාක්ෂණික ශක්යතාවන් උපරිම අයුරින් ප්රයෝජනයට ගනිමින් පාරිභෝගිකයාට වඩාත් පහසු සේවාවක් සැලසීමයි.
මෙහිදී විශේෂයෙන්ම අවධානය යොමු වූයේ කර්මාන්ත ඇතුළු විවිධ වාණිජ ක්ෂේත්රයන්හි ඉන්ධන අවශ්යතාවය කිසිදු බාධාවකින් තොරව සපුරා ගැනීම සඳහා ගත යුතු ඉදිරි ක්රියාමාර්ග පිළිබඳවයි. ඩිජිටල් තාක්ෂණය උපයෝගී කරගනිමින් ඉන්ධන බෙදාහැරීමේ ක්රියාවලිය විනිවිදභාවයකින් යුතුව පවත්වාගෙන යාමට මෙහිදී තීරණය විය.
මෙම අවස්ථාවට ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක ආචාර්ය හාන්ස් විජේසූරිය, බලශක්ති අමාත්යාංශයේ ලේකම් මහාචාර්ය උදයංග හේමපාල සහ ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල යන මහත්වරුන් ඇතුළු විෂය පථයට අදාළ ජ්යෙෂ්ඨ නිලධාරීන් සහ උපදේශකවරුන් පිරිසක් සහභාගී වූහ. මෙම නව වැඩිදියුණු කිරීම් හරහා ඉදිරියේදී ඉන්ධන කෝටාවන් කළමනාකරණය කිරීම වඩාත් විධිමත් වනු ඇතැයි අපේක්ෂා කෙරේ.
