ධවල මන්දිරය විසින් ‘The White House’ නමින් නව නිල දුරකතන යෙදවුමක් හඳුන්වා දී ඇති බව විදෙස් මාධ්ය අද (28) වාර්තා කරයි. මෙම නව යෙදවුම මගින් ඇමෙරිකානු ජනාධිපතිවරයාගේ දෛනික කටයුතු, නිල ප්රකාශ සහ ධවල මන්දිරය සම්බන්ධ සියලුම යාවත්කාලීන තොරතුරු ජනතාවට සෘජුවම ලබා ගැනීමට අවස්ථාව සලසා දී තිබේ. රජයේ විනිවිදභාවය සහ තොරතුරු සන්නිවේදනය වඩාත් කාර්යක්ෂම කිරීම මෙහි ප්රධාන අරමුණ වී ඇත. මේ අතර අමෙරිකානු මුදල් ඉතිහාසයේ සුවිශේෂී වෙනසක් සනිටුහන් කරමින්, මුදල් නෝට්ටුවක අත්සන් තැබූ ප්රථම ජනාධිපතිවරයා බවට ඩොනල්ඩ් ට්රම්ප් පත්වනු ඇති බව එරට භාණ්ඩාගාර දෙපාර්තමේන්තුව නිවේදනය කර තිබේ. ඒ අනුව ලබන ජූනි මාසයේ සිට නිකුත් කෙරෙන නව මුදල් නෝට්ටුවල ජනාධිපතිවරයාගේ අත්සන ඇතුළත් කිරීමට නියමිතය. 1861 වසරේ සිට වසර 165ක් පුරා ඇමෙරිකානු මුදල් නෝට්ටුවල අත්සන් කිරීමේ බලය හිමිව තිබුණේ එරට භාණ්ඩාගාරිකවරයා වෙත පමණි. මෙම දීර්ඝකාලීන සම්ප්රදාය නිමා කරමින් මින් ඉදිරියට භාණ්ඩාගාරිකවරයා වෙනුවට ජනාධිපතිවරයාගේ අත්සන මුදල් නෝට්ටුවලට එක් කිරීමට ගෙන ඇති තීරණය එරට මූල්ය ක්ෂේත්රයේ දැඩි අවධානයට ලක්ව තිබේ. ජනාධිපතිවරයාගේ මෙම මැදිහත්වීමත් සමඟ ඇමෙරිකානු ඩොලර් නෝට්ටුවේ ස්වරූපයෙහි ද යම් යම් වෙනස්කම් සිදුවනු ඇති බව විදෙස් මාධ්ය වාර්තාවල වැඩිදුරටත් සඳහන් වේ.
