ශ්රී ලංකාවේ නිෂ්පාදන ක්ෂේත්රයේ ජාත්යන්තර කීර්තිය යළිත් තහවුරු කරමින්, කොළඹ නැව් තටාකාංගනය (Colombo Dockyard) විසින් නෝර්වේ රාජ්යයේ මිස්ජේ ඉකෝ බල්ක් (Misje Eco Bulk) සමාගම වෙනුවෙන් නිෂ්පාදනය කරන ලද 10 වන සහ අවසාන නෞකාව ඊයේ (27) පස්වරුවේ නිල වශයෙන් භාර දෙන ලදී. 2020 වසරේදී ලැබුණු මෙම සුවිශේෂී ඇනවුමට අනුව නෞකා 9ක් මීට පෙර සාර්ථකව නිමවා භාර දී තිබූ අතර, ‘මිස්ජේ කැන්ඩි’ (Misje Kandy) ලෙස නම් කර ඇති මෙම අවසන් නෞකාව දේශීය ශිල්පීන්ගේ දක්ෂතාවයෙන් නිම වූවකි.
මීටර් 89.95ක දිගින් යුත් මෙම නෞකාව පරිසර හිතකාමී තාක්ෂණයෙන් යුත් විද්යුත් දෙමුහුන් ප්රචාලන පද්ධතියකින් (Electric Hybrid Propulsion) සහ උසස් බලශක්ති ගබඩා බැටරි පද්ධතියකින් සමන්විත වීම විශේෂත්වයකි. නෞකාව දියත් කිරීමේ චාරිත්රය ශ්රී ලාංකීය සම්ප්රදායට අනුව කිරි කළයක් නැව් බඳ වෙත යොමු කරමින් ව්යාපෘති කළමනාකරු එස්.එම්.එස්.බී. සේරසිංහ මහතා විසින් සිදු කළ අතර, බටහිර සම්ප්රදායානුකූලව ෂැම්පේන් බෝතලය බිඳීමේ චාරිත්රය මිස්ජේ ඉකෝ බල්ක් සමාගම වෙනුවෙන් දිලීෂ රෝස්මරී ද සිල්වා මහත්මිය විසින් ඉටු කරන ලදී.
මෙම අවස්ථාවට අමාත්ය අනුර කරුණාතිලක, නියෝජ්ය අමාත්යවරුන් වන ජනිත් කොඩිතුවක්කු සහ නිශාන්ත ජයවීර යන මහත්වරුන් එක්ව සිටියහ. එසේම ඉන්දීය මහකොමසාරිස් සන්තොෂ් ජා මහතා සහ කොළඹ නැව් තටාකාංගනයේ කළමනාකාර අධ්යක්ෂ තිමිර එස්. ගොඩකුඹුර මහතා ඇතුළු සම්භාවනීය පිරිසක් ද මෙම ඓතිහාසික අවස්ථාවට සහභාගී වූහ. මෙම සාර්ථක ව්යාපෘතිය නිමවීමත් සමඟ කොළඹ නැව් තටාකාංගනය ලෝකයේ ඉහළම ප්රමිතියෙන් යුත් නෞකා නිෂ්පාදකයෙකු ලෙස තම නාමය තවදුරටත් ජාත්යන්තරය තුළ සනිටුහන් කර ඇත.
