පුද්ගලික දුරකථන අංක අවභාවිත කරමින් සිදුකරන ඩිජිටල් හිරිහැර කිරීම් ඉහළ යාමත් සමඟ, එවැනි ක්රියාවලට එරෙහිව පවතින නීතිමය ආරක්ෂාව පිළිබඳව පොලීසිය මහජනතාව දැනුවත් කර තිබේ. 2024 අංක 39 දරන ශ්රී ලංකා විදුලි සංදේශ (සංශෝධන) පනතේ 32 වැනි වගන්තියට අනුව, සාධාරණ හේතුවක් නොමැතිව කෙනෙකුට කරදරයක් හෝ හිරිහැරයක් වන පරිදි නැවත නැවතත් දුරකථන ඇමතුම් ලබාදීම හෝ පණිවිඩ යැවීම දඬුවම් ලැබිය හැකි වරදකි. මීට අමතරව, යම් පුද්ගලයෙකුගේ දුරකථන අංකයක් ඔහුගේ කැමැත්තකින් තොරව සමාජ මාධ්ය ජාලවල හෝ වෙනත් ස්ථානයක ප්රසිද්ධ කිරීම ද මෙම නීතිය යටතේ වරදක් ලෙස සැලකේ.
මෙම වැරදි සඳහා වරදකරු වන පුද්ගලයෙකුට රුපියල් 100,000 නොඉක්මවන දඩයක් නියම කළ හැකි අතර, එම දඩය නොගෙවන්නේ නම් මාස හයක දක්වා සිරදඬුවමක් නියම කළ හැකිය. තවද, අදාළ වරද සිදුකිරීමට භාවිතා කළ දුරකථන මාර්ගය විසන්ධි කිරීමට ද බලධාරීන්ට බලය පවතී. මෙවැනි හිරිහැරයන්ට ලක්වන පුද්ගලයින්ට ඒ පිළිබඳව අපරාධ පරීක්ෂණ දෙපාර්තමේන්තුවට හෝ ළඟම පිහිටි පොලිස් ස්ථානයට පැමිණිලි කර නීතිමය සහනයක් ලබාගත හැකි බව පොලීසිය වැඩිදුරටත් සඳහන් කරයි.
