එල් සැල්වදෝරය තුළ මනුෂ්ය ඝාතන, තේරස්වාදය හෝ ස්ත්රී දූෂණය වැනි බරපතළ අපරාධවලට සම්බන්ධ වන වයස අවුරුදු 12 තරම් කුඩා දරුවන්ට පවා ජීවිතාන්තය දක්වා සිරදඬුවම් නියම කිරීමට ඉඩ සලසන නව නීතියක් එරට රජය විසින් ප්රකාශයට පත් කර තිබේ. එල් සැල්වදෝරයේ ජනාධිපති නයිබ් බුකෙලේ (Nayib Bukele) ගේ මූලිකත්වයෙන් ගෙන එන ලද මෙම දැඩි නීතිමය සංශෝධනය එළඹෙන අප්රේල් 26 වනදා සිට ක්රියාත්මක වීමට නියමිතය.
එල් සැල්වදෝරය පුරා ව්යාප්ත වී ඇති දරුණු කල්ලිකණ්ඩායම් ප්රචණ්ඩත්වය (Gang Violence) මර්දනය කිරීම සඳහා ජනාධිපතිවරයා ගෙන යන දැඩි ප්රතිපත්තියේ කොටසක් ලෙස මෙම නීතිය හඳුන්වා දී ඇත. 2022 වසරේ සිට ක්රියාත්මක වන හදිසි නීති තත්ත්වය යටතේ මේ වන විට පුද්ගලයන් 90,000කට අධික පිරිසක් අත්අඩංගුවට ගෙන ඇති අතර, එය එරට සමස්ත ජනගහනයෙන් 1.9%ක් පමණ වේ.
එක්සත් ජාතීන්ගේ ළමා අරමුදල (UNICEF) ඇතුළු මානව හිමිකම් සංවිධාන රැසක් මෙම පියවර පිළිබඳව සිය දැඩි කනස්සල්ල පළ කර ඇත. දරුවන්ට ජීවිතාන්තය දක්වා සිරදඬුවම් ලබා දීම එක්සත් ජාතීන්ගේ ළමා අයිතිවාසිකම් පිළිබඳ සම්මුතියට පටහැනි බවත්, එමගින් අපරාධ රැල්ල පාලනය වීම වෙනුවට දරුවන්ගේ අනාගත සංවර්ධනයට හානියක් සිදුවන බවත් එම සංවිධාන පෙන්වා දෙයි.
මෙම නීතිය හරහා දරුවන්ට හිමිව තිබූ ඇතැම් නීතිමය ආරක්ෂාවන් ඉවත් කෙරුණ ද, යම් නිශ්චිත කාලසීමාවකට පසු දඬුවම් සමාලෝචනය කිරීමේ සහ අධීක්ෂණය යටතේ මුදා හැරීමේ හැකියාව පවතින බව රජය පවසයි. ජනාධිපති බුකෙලේ අවධාරණය කරන්නේ මිනීමරුවන් සහ දූෂකයන් සිරගෙවල්වලින් පිටත සිටීමට ඉඩ දිය නොහැකි බවයි.
මානව හිමිකම් නිරීක්ෂකයින් චෝදනා කරන්නේ මෙම දැවැන්ත සිරගත කිරීම් සහ සමූහ නඩු විභාග (Mass Trials) හරහා මූලික මිනිස් අයිතිවාසිකම් දරුණු ලෙස උල්ලංඝනය වන බවයි. මෑතකදී නිකුත් වූ වාර්තාවකට අනුව, අත්අඩංගුවට ගත් පිරිස අතරින් අවම වශයෙන් 8,000ක් පමණ අහිංසක පුද්ගලයන් බවට ද හඳුනාගෙන තිබේ.
