සමෘද්ධිලාභී නිවාස වෙත විදුලිය පහසුකම් ලබා දීම සඳහා ක්රියාත්මක දැයට එළිය ජාතික වැඩසටහනේ මුල් අදියර ඇරඹෙන බව මුදල් රාජ්ය අමාත්ය ශෙහාන් සේමසිංහ මහතා පවසයි.
අලුත් අවුරුද්දට පෙර තෝරා ගත් අඩු ආදායම්ලාභී නිවාස වෙත ආසන්නතම කණුවේ සිට විදුලි සැපයුම ලබා දීම සිදු කෙරේ.
රාජ්ය අමාත්ය ශෙහාන් සේමසිංහ මහතා මේ බව පැවසුවේ මිහින්තලේ ප්රාදේශීය ලේකම් කොට්ඨාසයට අයත් වෙරුප්පන්කුලම ග්රාමයේ දී පසුගිය 20 වනදා මෙම වැඩසටහන සඳහා විදුලි බල අමාත්යාංශය සහ සමෘද්ධි සංවර්ධන දෙපාර්තමේන්තුව එක්ව දායකත්වය ලබා දෙමිනි.
මේ යටතේ විදුලි බල මණ්ඩලය මගින් ආසන්නතම කණුවේ සිට නිවාසය වෙත විදුලිය ලබා දීම නොමිලේ සිදු කෙරෙන අතර නිවාස අභන්තර පරිපථ සකස් කර ගැනීම සඳහා අවශ්ය ණය පහසුකම් ලබා දීම සමෘද්ධි සංවර්ධන දෙපාර්තමේන්තුව මගින් සිදු කෙරේ. ඒ වෙනුවෙන් සමෘද්ධිලාභීන් වෙත 4% සහන පොලී අනුපාතයක් යටතේ රුපියල් 20,000/= ණය මුදලක් සමෘද්ධි බැංකු මගින් නිකුත් කෙරේ.
එහිදී අදහස් දැක් වූ රාජ්ය අමාත්ය ශෙහාන් සේමසිංහ මහතා “පස් වැනි විධායක ජනාධිපති, වත්මන් අග්රාමාත්ය ගරු මහින්ද රාජපක්ෂ මැතිතුමා සැමට විදුලිය ලබා දීම සඳහා ආරම්භ කළ වැඩසටහන 2015න් පස්සෙ අඩාල වෙලා ගියා. යහපාලන සමය තුළ යම් යම් වැඩසටහන් ක්රියාත්මක වුණත් ඒ සියල්ල සිදු වුණේ දේශපාලන හිතවත්කම් මත. ඒ නිසා තමයි විදුලිය පහසුකම් නොමැති 80,000ටක අධික නිවාස ප්රමාණයක් ඉතුරු වෙලා තියෙන්නෙ. 2021 වසර අවසන් වන විට ඒ නිවාස වෙත විදුලිය ලබා දීම අපි අවසන් කරනවා. එහි මුල් අදියර තමයි මේ විදියට සිංහල දෙමළ අලුත් අවුරුද්දට පෙර නිවාස වෙත විදුලි රැහැන් ඇදීමෙන් ආරම්භ වෙන්නෙ. කනුවේ සිට නිවස දක්වා විදුලිය නොමිලේ ලැබුණට අපි දන්නවා නිවාස අභ්යන්තර විදුලි පරිපථ සකස් කර ගන්න ආර්ථික ශක්තියක් නැති පිරිස ඉන්නවා. ඒ අනුව අපි තීරණය කළා. සමෘද්ධි බැංකු මගින් ඔවුන්ට සහන පොලී අනුපාතයක් යටතේ ණය මුදලක් දෙන්න. සමෘද්ධි බැංකුව හැර ලංකාවේ කිසිම බැංකුවක් 4% පොලියට ණයට දෙන්නෙ නෑ.”
මෙම වැඩසටහන සඳහා රුපියල් මිලියන 750කට අධික මුදලක් 2021 අයවැය මගින් විදුලි බල අමාත්යාංශය වෙත ලබා දී තිබේ. ඊට අතිරේක මුදලක් වැයවේ නම් එම මුදල ලබා දීමට මුදල් අමාත්යවරයා ලෙස ගරු අග්රාමාත්ය මහින්ද රාජපක්ෂ මහතා එකඟත්වය පළ කර ඇති බව ද ශෙහාන් සේමසිංහ මහතා පැවැසීය. දරිද්රතාව පිටු දැකීම සඳහා බැසිල් රාජපක්ෂ මහතාගේ ප්රධානත්වයෙන් ක්රියාත්මක ජනාධිපති කාර්ය සාධක බලකාය මගින් මෙම වැඩසටහනේ සම්බන්ධීකරණ කටයුතු සිදු කරනු ලබයි.
අනුරාධපුර සමෘද්ධි දිස්ත්රික් අධ්යක්ෂ ඩබ්ලියූ.ඒ. වසන්ත, සමෘද්ධි සහකාර අධ්යක්ෂ මහින්ද වීරකෝන්, හිටපු අමාත්ය එච්.බී සේමසිංහ යන මහත්වරු ඇතුළු පිරිසක් මෙම අවස්ථාවට එක් වූහ.
