ශ්රී ලංකාවට අයත් දූපත් ප්රදේශවල ජීවත් වන ජනතාව මුහුණ දෙන එදිනෙදා ගැටලුවලට කඩිනමින් විසඳුම් සෙවීමේ අරමුණින් ධීවර, ජලජ සහ සාගර සම්පත් අමාත්ය රාමලිංගම් චන්ද්රසේකර් මහතාගේ ප්රධානත්වයෙන් වේලනයි ප්රාදේශීය ලේකම් කාර්යාලයේ දී විශේෂ සාකච්ඡාවක් පවත්වා තිබේ. මෙයට උතුරු පළාත් ආණ්ඩුකාර නාගලිංගම් වේදනායගන්, පාර්ලිමේන්තු මන්ත්රීවරුන් වන කරුණනාදන් ඉලංගුමරන්, ජයචන්ද්රමූර්ති රජීවන් සහ ආරක්ෂක අංශ ප්රධානීහු ඇතුළු පිරිසක් සහභාගී වූහ. ნෙඩෙන්තීව්, ඌර්කාවතුරෙයි, කාරයිනගර් සහ වේලනයි ඇතුළු දූපත්වල පවතින අත්යවශ්ය ගැටලු සඳහා කඩිනම් විසඳුම් ලබාදීමට එහිදී තීරණ රැසක් ගන්නා ලදී.
දූපත්වල පවතින ගුරු හිඟය සහ නවාතැන් පහසුකම් පිළිබඳ අවධානය යොමු වූ අතර, විශේෂයෙන් නෙඩෙන්තීව් ප්රදේශයේ පාසල්වල අඩුපාඩු පියවීමට විශේෂ ක්රියාමාර්ග සැලැස්මක් සකස් කිරීමට උපදෙස් දී තිබේ. එමෙන්ම නෙඩෙන්තීව් ප්රවාහන සේවාව සඳහා භාවිත කරන ‘නෙදුන්තාරකයි’ සහ ‘වඩතාරකයි’ මගී ප්රවාහන බෝට්ටු අලුත්වැඩියා කර ලබන මාසයේ සිට නැවත සේවයට එක් කිරීමට ද කටයුතු යොදා ඇත.
මීට අමතරව, නෙඩෙන්තීව් වැසියන් වෙනුවෙන් නව Reverse Osmosis (RO) ජල පිරිපහදු පද්ධතියක් ස්ථාපනය කිරීමට භාණ්ඩාගාරයෙන් මුදල් ලබාගැනීමට කටයුතු කෙරෙන අතර, අනලතීව් ප්රදේශයට ඉක්මනින් ගිලන් රථයක් ලබාදීමට ද පියවර ගැනේ. ලෝක බැංකු ආධාර මත දූපත්වල රෝහල් ප්රතිසංස්කරණය වන අතර, ජනාධිපති අනුර කුමාර දිසානායක මහතාගේ උපදෙස් මත යාපනයේ පවතින වැසිකිළි අවශ්යතා පියවීමට ද ප්රමුඛතාවය හිමි වේ.
ආරක්ෂක අංශ සම්බන්ධයෙන් ගත් කල, දිගුකාලීන ගව සොරකම් මැඩපැවැත්වීමට පොලීසිය සහ විශේෂකාර්ය බලකාය (STF) එක්ව ක්රියා කරන අතර, මණ්ඩතීව් පරීක්ෂණ මුරපොළේ ආරක්ෂාව නාවික හමුදාව සමඟ එක්ව ශක්තිමත් කිරීමට තීරණය විය. අවසාන වශයෙන්, අනලතීව්, පුංගුඩතීව් සහ කුරිකඩ්ඩුවන් ප්රදේශවල ලංකා බැංකු (BOC) ATM යන්ත්ර ස්ථාපනය කිරීමට කඩිනම් පියවර ගන්නා බවට ද මෙහිදී සහතික විය.
