නීතිවිරෝධී ලෙස අල්ලන ලද මෝර මසුන් සහ මෝර වරල් තොගයක් සමඟ ධීවරයින් සිව්දෙනෙකු ශ්රී ලංකා වෙරළ ආරක්ෂක දෙපාර්තමේන්තුව විසින් අත්අඩංගුවට ගෙන තිබේ.
අගෝස්තු 05 වන දින දහවල් සුදුවැල්ල ධීවර වරාය පරිශ්රයේදී සිදු කරන ලද විශේෂ මෙහෙයුමකදී මෙම අත්අඩංගුවට ගැනීම සිදු කර ඇත. මෙහිදී නීතිවිරෝධී ලෙස අල්ලන ලද මෝර මසුන් සහ මෝර වරල් කිලෝග්රෑම් 223.94ක තොගයක් සොයාගෙන තිබේ.
අදාළ මත්ස්ය තොගය මෙරට බහුදින ධීවර යාත්රාවකින් ගොඩබිමට රැගෙන ඒමෙන් අනතුරුව, එම ධීවර යාත්රාවද සමඟ සැකකරුවන් අත්අඩංගුවට ගෙන ඇත. අත්අඩංගුවට ගත් සැකකරුවන්, ධීවර යාත්රාව සහ මත්ස්ය තොගය ඉදිරි නීතිමය කටයුතු සඳහා සුදුවැල්ල ධීවර පරීක්ෂක කාර්යාලය වෙත භාරදී තිබේ.
වර්ෂ 2015 ඔක්තෝබර් මස 26 වන දිනැති අංක 1938/2 දරන අතිවිශේෂ ගැසට් පත්රයේ විධිවිධාන උල්ලංඝනය කරමින් මෙම මත්ස්ය දඩයම සිදු කිරීම හේතුවෙන් අදාළ සැකකරුවන්ට එරෙහිව නීතිමය පියවර ගෙන ඇත.
