වසර 13කට අධික කාලයක් නායයෑම් අවදානම හමුවේ අනාරක්ෂිතව ජීවත් වූ වතු පවුල් 51ක් සඳහා නව නිවාස ඉදිකිරීමේ කටයුතු ඉන්දීය ආධාර යටතේ අද (29) ආරම්භ කෙරිණි. “පොහොසත් රටක් – ලස්සන ජීවිතයක්” ජාතික ප්‍රතිපත්තිය තහවුරු කරමින්, වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න මහතාගේ සහ ශ්‍රී ලංකාවේ ඉන්දියානු මහකොමසාරිස් කාර්යාල නියෝජිතයන්ගේ ප්‍රධානත්වයෙන් බදුල්ල ඌවපරණගම අලගොල්ල වතුයායේදී මෙම මුල්ගල් තැබීම සිදු විය. මලයගම් ප්‍රජාවට ගෞරවනීය මෙන්ම සුරක්ෂිත ජීවන පරිසරයක් උරුම කර දීමේ අරමුණින් ක්‍රියාත්මක වන මෙම ව්‍යාපෘතිය, දිගුකාලීනව පැවති මානුෂීය ගැටලුවකට ලැබුණු තිරසාර විසඳුමක් ලෙස හැඳින්විය හැකිය.
ඉන්දියානු රජයේ මූල්‍ය දායකත්වයෙන් ක්‍රියාත්මක වන නිවාස 10,000ක මහා පරිමාණ ව්‍යාපෘතියේ සිව්වන අදියර යටතේ ක්‍රියාත්මක වන මෙම වැඩසටහන තුළ එක් නිවාස ඒකකයක් සඳහා ඉන්දීය රජයෙන් රුපියල් ලක්ෂ 28ක ප්‍රතිපාදන හිමි වන අතර, ශ්‍රී ලංකා රජය විසින් අතිරේක යටිතල පහසුකම් සංවර්ධනය වෙනුවෙන් එක් නිවසකට රුපියල් ලක්ෂ 4ක මුදලක් වෙන් කර ඇත. දේශගුණික විපර්යාස හා ආපදා අවදානම් හේතුවෙන් අන්ත අසරණ තත්ත්වයට පත්ව සිටි වතු ශ්‍රමික පවුල් වෙත මෙවැනි පහසුකම් ලබා දීම හරහා ඔවුන්ගේ සමාජ-ආර්ථික මට්ටම ඉහළ නැංවීමටත්, කම්කරු ජනතාවගේ ජීවන තත්ත්වය සුරක්ෂිත කිරීමටත් ජාතික මට්ටමින් සුවිශේෂී බලපෑමක් එල්ල වනු ඇත.
මෙම ව්‍යාපෘතියේ සාර්ථකත්වය ඉදිරියේදී දිවයිනේ අනෙකුත් වතු ආශ්‍රිතව පවතින සමාන අභියෝගයන්ට මුහුණ දීමට බලධාරීන්ට මඟ පෙන්වන කඩඉමක් වනු නොඅනුමානය. ද්විපාර්ශ්වික සහයෝගීතාව මත ක්‍රියාත්මක වන මෙම ජනහිතකාමී වැඩපිළිවෙළ මඟින් ශ්‍රී ලංකාවේ වතු ප්‍රජාවගේ මූලික මිනිස් අයිතිවාසිකම් සහ සුරක්ෂිතභාවය තහවුරු කිරීමේ නව පරිච්ඡේදයක් ඉදිරියටත් ක්‍රියාත්මක වනු ඇතැයි අපේක්ෂා කෙරේ.
