ගාසා නගරයේ පිහිටි මහ නගර සභා පොලිස් මූලස්ථානයට ඊශ්රායලය විසින් එල්ල කරන ලද ගුවන් ප්රහාරයකින් වයස අවුරුදු 13ක දැරියක් සහ ඉහළ පෙළේ නිලධාරීන් ඇතුළු පලස්තීනුවන් 9 දෙනෙකු ජීවිතක්ෂයට පත්ව තිබේ. මෙම ප්රහාරයෙන් තවත් පුද්ගලයින් 15 දෙනෙකු තුවාල ලබා ඇති බව වෛද්යවරුන් සහ පොලිස් ආරංචි මාර්ග තහවුරු කරයි.
සිවිල් පොලිස් මධ්යස්ථානය තුළ ක්රියාත්මක වෙමින් ඊශ්රායල හමුදාවට එරෙහි ප්රහාර දියත් කළ හමාස් සටන්කාමීන් ඉලක්ක කර මෙම ප්රහාරය එල්ල කළ බව ඊශ්රායල හමුදාව ප්රකාශ කර ඇත. මීට අමතරව, මධ්යම ගාසාහි නුසෙයිරාට් සරණාගත කඳවුරට එල්ල වූ තවත් ප්රහාරයකින් තවත් පලස්තීනුවෙකු මියගොස් ඇති අතර, ඒ සමඟ එදින සමස්ත මරණ සංඛ්යාව 10 දක්වා ඉහළ ගොස් තිබේ.
මේ අතර, ඩොනල්ඩ් ට්රම්ප්ගේ සාම සැලැස්ම ක්රියාත්මක කිරීම අරමුණු කරගනිමින් ඇමරිකානු නියෝජිත ජෙරඩ් කුෂ්නර් මෑතකදී සිදු කළ මැදපෙරදිග සංචාරය අසාර්ථක වීමත් සමඟ කලාපයේ රාජ්යතාන්ත්රික ප්රගතිය යළිත් ඇණහිට තිබේ. හමාස් සංවිධානය සම්පූර්ණයෙන්ම නිරුද්ධ වන තෙක් හමුදාව ඉවත් කර නොගන්නා බව ඊශ්රායල අග්රාමාත්ය බෙන්ජමින් නෙතන්යාහු අවධාරණය කර ඇති අතර, ඊශ්රායලය දිගින් දිගටම ඉලක්කගත ප්රහාර එල්ල කරනු ලැබුවහොත් එය සටන් විරාම ගිවිසුම කෙරෙහි බලපාන බව හමාස් සංවිධානය ඊජිප්තුව, කටාර් සහ තුර්කිය යන මැදිහත්කරුවන්ට දැනුම් දී ඇත.
තොරතුරු උපුටා ගැනීම: Reuters ඇසුරින්
