බස්නාහිර පළාත් උතුර අපරාධ කොට්ඨාශයේ නිලධාරීන්ට ලැබුණු රහසිගත තොරතුරක් මත කඩවත, වෑබඩ ප්රදේශයේ සිදු කළ වැටලීමකදී, අතිවිශාල ගිනි අවි තොගයක් සහ මත්ද්රව්ය සමඟ අත්අඩංගුවට ගත් සැකකරුවෙක් මෙරට දැඩි ආන්දෝලනයට ලක් වූ ඩෑන් ප්රියසාද් සහ ඔහුගේ සහෝදරයාගේ ඝාතන රැල්ලේ ප්රධාන පෙළේ සැකකරුවෙකු බව පොලිස් විමර්ශනවලින් අනාවරණය වී තිබේ. කුලී නිවසක රඳවා තිබී සොයාගත් මෙම මාරාන්තික ආයුධ අතර දේශීයව නිෂ්පාදිත ගිනි අවි 8 ක්, විවිධ වර්ගයේ සජීවී පතොරම් 534 ක්, අත් මාංචු යුගල දෙකක් සහ කිලෝග්රෑම් දෙකකට අධික හෙරොයින් තොගයක් වන අතර, මෙම අපරාධ ජාලය පසුපස විදේශගතව සිටින ප්රධාන පෙළේ සංවිධානාත්මක අපරාධකරුවෙකු සිටින බවට මූලික විමර්ශනවලදී හෙළි වී ඇත.
මෙම සැකකරුගේ පියා ද ඩෑන් ප්රියසාද් ඝාතනයේ ප්රධාන සැකකරුවෙකු ලෙස හඳුනාගෙන ඇති පසුබිමක, මෙලෙස අවි ආයුධ සහ මත්ද්රව්ය ගබඩා කරමින් විවිධ පාර්ශ්ව වෙත බෙදාහැරීමේ ප්රධාන මෙහෙයුම්කරු ලෙස මොහු ක්රියා කර ඇති බවට හෙළිවීම රටේ ආරක්ෂාව සම්බන්ධයෙන් බරපතල තත්ත්වයක් මතු කර තිබේ. සංවිධානාත්මක අපරාධකරුවන් සහ මත්ද්රව්ය ජාවාරම්කරුවන් විසින් මෙරට තුළ යළිත් වරක් ප්රචණ්ඩකාරී ක්රියාකාරකම් පුළුල් කිරීම සඳහා මෙවැනි අවි ආයුධ අවභාවිත කරමින් සිටින බවට මෙම සිදුවීම කදිම සාක්ෂියක් වන අතර, නීතියේ රැකවරණය මඟහැර විදේශගතව සිටින අපරාධකරුවන්ගේ ජාලය මෙරට තුළ ක්රියාත්මක වන ආකාරය පිළිබඳව ආරක්ෂක අංශවල දැඩි අවධානය යොමුව ඇත.
මෙම වැටලීම හරහා අනාවරණය කරගත් තොරතුරු මත පදනම්ව ඉදිරියේදී මෙම අපරාධ ජාලයට සම්බන්ධ තවත් ප්රබලයන් රැසක් නීතියේ රැහැට හසුකර ගැනීමට හැකි වනු ඇතැයි අපේක්ෂා කෙරෙන අතර, මත්ද්රව්ය සහ නීතිවිරෝධී ගිනි අවි සංසරණය වැළැක්වීම සඳහා ආරක්ෂක අංශ විසින් විශේෂ මෙහෙයුම් අඛණ්ඩව ක්රියාත්මක කිරීම ජාතික ආරක්ෂාව තහවුරු කිරීම පිණිස අත්යවශ්ය සාධකයක් බවට පත්ව තිබේ.
