‘දිට්වා’ ආපදාවෙන් පූර්ණ නිවාස හානි වූ මහනුවර, ගඟවට කෝරළය ප්රාදේශීය ලේකම් කොට්ඨාශයේ පවුල් 44ක් සඳහා ඉහළ වටිනාකමකින් යුතු ඉඩම් ලබා දීම කෘෂිකර්ම, ඉඩම්, පශු සම්පත් සහ වාරිමාර්ග අමාත්ය කේ.ඩී. ලාල් කාන්ත මහතාගේ ප්රධානත්වයෙන් පසුගියදා සිදු කෙරුණි.
ජාතික නිවාස සංවර්ධන අධිකාරියට අයත් හන්තාන ප්රදේශයේ ඉහළ මූල්යමය වටිනාකමකින් යුතු ඉඩම් කට්ටි මේ සඳහා තෝරාගෙන ඇත. තමන් පදිංචිව සිටි ස්ථානවලට වඩා ආරක්ෂිත සහ වටිනාකමින් වැඩි බිම් කොටස් මෙලෙස ජනතාවට හිමි වූ බව අමාත්යවරයා මෙහිදී පෙන්වා දුන්නේය. එක් නිවසක් ඉදිකිරීම සඳහා රජයෙන් රුපියල් ලක්ෂ 50ක වන්දි මුදලක් වාරික වශයෙන් ලබා දීමට නියමිතය. මෙම මුදල් පාතහේවාහැට ප්රාදේශීය ලේකම් කාර්යාලය හරහා නිසි අධීක්ෂණය යටතේ නිකුත් කෙරේ.
ඉදිරි මාස හතරක කාලය තුළ මෙම ඉඩම්වල නිවාස ඉදිකිරීම් අවසන් කිරීමට සැලසුම් කර ඇත.
නොමිලේ තාක්ෂණික සහාය: නිවාස ඉදිකිරීමේදී අවශ්ය වන තාක්ෂණික උපදෙස් සහ සැලසුම් සහාය ජාතික නිවාස සංවර්ධන අධිකාරිය විසින් නොමිලේ ලබා දීමට ඉදිරිපත් වී තිබේ.
මහනුවර දිස්ත්රික් ලේකම් කාර්යාලයේ පැවති මෙම දීමනා පත් ප්රදානය කිරීමේ අවස්ථාවට මහනුවර දිස්ත්රික් පාර්ලිමේන්තු මන්ත්රීවරුන් වන තනුර දිසානායක, ඊ.එම්. බස්නායක සහ දිස්ත්රික් ලේකම් ඉන්දික උඩවත්ත මහතා ඇතුළු නිලධාරීහු පිරිසක් එක්ව සිටියහ.
