පසුගිය ‘දිට්වා’ ආපදා තත්ත්වයෙන් කොලොන්නාව ආසනයේ හානියට පත් නිවාස සඳහා හානිපූර්ණ වන්දි ලබාදීමේ වැඩසටහනේ අටවන අදියර ක්රියාත්මක කරමින් නිවාස හිමියන් 1,119 දෙනෙකු සඳහා වන්දි ප්රදානය ඊයේ (08) සිදුකෙරිණ. මෙම චෙක්පත් ප්රදානය කොලොන්නාව ප්රාදේශීය සම්බන්ධීකරණ කමිටු සභාපති, නාගරික සංවර්ධන නියෝජ්ය අමාත්ය එරංග ගුණසේකර මහතාගේ ප්රධානත්වයෙන් කොලොන්නාව පුරාණ විහාරස්ථානයේ දී පැවැත්විණි.
කොලොන්නාව ආසනයේ ග්රාම සේවා වසම් 46ක ජනතාව සඳහා රජය විසින් අර්ධ හානි, පූර්ණ හානි සහ ව්යාපාරික හානි වශයෙන් රුපියල් ලක්ෂ පහේ සිට ලක්ෂ පනහ දක්වා මූල්ය සීමා තුළ වන්දි ලබාදීම සිදු කෙරේ. මෙහිදී ග්රාම සේවා වසම් විස්සක නිවාස හිමියන්ට වන්දි ප්රදානය කෙරුණු අතර, ඒ අතරට මුල්ලේරියාව උතුර, උඩුමුල්ල උතුර, මුල්ලේරියාව දකුණ, කොටිකාවත්ත නැගෙනහිර සහ බටහිර, මහබුත්ගමුව සී, වෙලේවත්ත, කොටුවිල, සේදවත්ත, හල්මුල්ල, මෙගොඩ කොලොන්නාව, බෝපැත්ත, අඹතලේ, කැලණිමුල්ල, බැලගම, බටලන්දහේන, මහබුත්ගමුව බී, වෙන්නවත්ත, කිත්තම්පහුව සහ සාලමුල්ල අයත් වේ.
කොලොන්නාව ප්රාදේශීය ලේකම් ප්රියනාත් පෙරේරා මහතා සඳහන් කළේ, මේ වනවිට නිවාස හිමියන් 8,200කට පළමු වාරිකයේ වන්දි ගෙවා අවසන් බවත්, වසර අවසන් වීමට පෙර අනුමත චක්රලේඛ ප්රකාරව සියලු හානි සඳහා වන්දි මුදල් ගෙවා අවසන් කරන බවත්ය. අර්ධ හානි වන්දි ගෙවීමට සමගාමීව, පූර්ණ හානිවූ නිවාස 131ක් සඳහා ද වන්දි ගෙවීම ආරම්භ කෙරුණු අතර, සුදුසුකම් සපුරා ඇති තිදෙනෙකුට පළමු වාරිකය වශයෙන් රුපියල් ලක්ෂ විස්සක වටිනාකමින් යුත් චෙක්පත් පිරිනැමිණි.
උත්සවයේදී අදහස් දැක්වූ නියෝජ්ය අමාත්ය එරංග ගුණසේකර මහතා පැවසුවේ, මෙම වන්දි ජනතාවගේ බදු මුදල්වලින් සුරක්ෂිතව ලබාදෙන බවත්, ඇතැම් දේශපාලන කණ්ඩායම් පටු අරමුණු වෙනුවෙන් මෙම වැඩපිළිවෙල කඩාකප්පල් කිරීමට උත්සාහ දරන බවත්ය. තවද, කොලොන්නාවේ ගංවතුර උවදුර පාලනයට රුපියල් ලක්ෂ 1,500ක් වෙන් කර ඇති බවත්, ප්රධාන ඇළ මාර්ග ප්රතිසංස්කරණය කිරීම, කුඩා පාලම් 55ක් සංවර්ධනය කිරීම සහ ජල රඳවන තටාක 7ක් ඉදිකිරීම හරහා ස්ථිර විසඳුමක් ලබාදීමට කටයුතු කරන බවත් ඔහු ප්රකාශ කළේය. වැඩිම හානි සිදුවන පවුල් 4,000ක් සඳහා මීතොටමුල්ල ප්රදේශයේ නව නිවාස සංකීර්ණයක් ඉදිකිරීමට දැනටමත් සැලසුම් සකස් කර තිබේ.
