මෙවර මැයි දිනය සැමරීමට තමාගේ බලාපොරොත්තුවක් නැති බවත්, එදිනට තමා ආගමික කටයුතුවල නිරත වන බවත් හිටපු ජනාධිපති මෛත්රීපාල සිරිසේන මහතා ප්රකාශ කර තිබේ. අල්ලස් කොමිසමට ප්රකාශයක් ලබා දීම සඳහා ඊයේ (28) පැමිණි අවස්ථාවේදී මාධ්යවේදීන් නැගූ ප්රශ්නවලට පිළිතුරු දෙමින් ඔහු මේ බව සඳහන් කළේය.
උමා ඔය ව්යාපෘතිය ඉදිකිරීමේදී ඇති වූ ගැටලු සහ ඒ හා සම්බන්ධ මුදල් ගෙවීම් පිළිබඳ විමර්ශනයකට ප්රකාශයක් ලබා දීමට තමා මෙලෙස අල්ලස් කොමිසම හමුවට පැමිණි බව හිටපු ජනාධිපතිවරයා මෙහිදී පැහැදිලි කළේය. රාජපක්ෂ පාලන සමයේ ආරම්භ කළ මෙම ව්යාපෘතිය 2015 දී තමා භාර ගන්නා විට එය යුද්ධයක් පවතින රටක් භාර ගත්තාක් මෙන් අසීරු තත්ත්වයක පැවති බව ඔහු සඳහන් කළේය. ළිං ජලය නැති වීම, මාර්ග පුපුරා යාම සහ නිවෙස් කඩා වැටීම වැනි හානි නිසා එකල ප්රදේශයේ විශාල ජනතා උද්ඝෝෂණ ඇති වූ බව ද ඔහු සිහිපත් කළේය.
ඉරාන රජයේ ණය ආධාර මත ආරම්භ වූ මෙම ව්යාපෘතියට, අමෙරිකාව ඉරානයට පැනවූ සම්බාධක හේතුවෙන් ඩොලර් ලැබීම නැවතී තිබූ බවත්, පසුව රජයේ භාණ්ඩාගාර මුදලින් එය නිම කිරීමට සිදු වූ බැවින් ව්යාපෘතිය සඳහා වැඩි කාලයක් ගත වූ බවත් ඔහු පෙන්වා දුන්නේය. ව්යාපෘතිය සඳහා වැය වූ ගෙවීම් සම්බන්ධයෙන් වංචාවක් සිදුව ඇති බව තමාට පිළිගත නොහැකි බව හිටපු ජනාධිපතිවරයා අවධාරණය කළේය.
එම ප්රදේශයේ පැවති උද්ඝෝෂණ හමුවේ සේවය කිරීමට අකමැති වූ ඉංජිනේරුවන්ට වැඩි දීමනා ලබා දීම ඇතුළු සියලු තීන්දු ගනු ලැබුවේ කැබිනට් අනුමැතිය සහ මුදල් අමාත්යවරයාගේ එකඟතාව මත බව ඔහු වැඩිදුරටත් කියා සිටියේය. නිසි ලෙස ලිපිගොනු පරීක්ෂා නොකර මෙවැනි කරුණු සම්බන්ධයෙන් චෝදනා කිරීම වැරදි සහගත බව ද ඔහු මෙහිදී අවධාරණය කළේය.
