දේශසීමා රහිත වෛද්යවරුන්ගේ සංවිධානය (MSF) විසින් සංවිධානය කරන ලද සිව්වන සෞඛ්ය සහ මනුෂ්යත්ව සමුළුව කොළඹදී ආරම්භ වී ඇති අතර, එහිදී ප්රතිපත්ති සම්පාදකයින්, සෞඛ්ය විශේෂඥයින්, මානුෂීය වෘත්තිකයන් සහ සිවිල් සමාජ නියෝජිතයන් රැසක් අනාගත මානුෂීය ක්රියාමාර්ග සම්බන්ධයෙන් සාකච්ඡා සඳහා එක්ව සිටිති.
“මානුෂීයවාදයේ අනාගතය අපේක්ෂා කිරීම” යන තේමාව යටතේ පැවැත්වෙන මෙම 2026 සමුළුවේදී, උදාසීනත්වය, ස්වාධීනත්වය සහ අපක්ෂපාතීත්වය යන මූලධර්ම ආරක්ෂා කර ගනිමින් භූ දේශපාලනික වෙනස්කම්, දේශගුණික හදිසි අවස්ථා සහ වෙනස් වන ගෝලීය සෞඛ්ය ප්රමුඛතාවලට මානුෂීය ප්රතිචාර අනුවර්තනය වන ආකාරය පිළිබඳව දැඩි අවධානය යොමු කර ඇත.
සමුළුව අමතමින් දේශසීමා රහිත වෛද්යවරුන්ගේ සංවිධානයේ දකුණු ආසියානු විධායක අධ්යක්ෂ පාර්ථසාරති රාජේන්ද්රන් මහතා සඳහන් කළේ අර්බුද ඇති වන ආකාරය සහ ප්රතිචාර සඳහා අරමුදල් සපයන අයුරු වෙනස් වෙමින් පවතින මෙම වකවානුව මානුෂීය ක්රියාමාර්ග සම්බන්ධයෙන් තීරණාත්මක මොහොතක් බවයි. දේශපාලනය හෝ භූගෝලීය පිහිටීම නොසලකා සෑම පුද්ගලයෙකුටම කාලෝචිත සහ ගුණාත්මක සෞඛ්ය සේවයක් ලබා ගැනීමට අයිතියක් ඇති බව ඔහු මෙහිදී වැඩිදුරටත් අවධාරණය කළේය.
මානුෂීය සහ සෞඛ්ය ව්යුහයේ අනාගතය, ගෝලීය සෞඛ්ය සහ මානුෂීයවාදය තුළ කාන්තා නායකත්වය සහ සෞඛ්ය සේවා ස්වෛරීභාවය යන ප්රධාන අංශ තුනක් කෙරෙහි සමුළුවේ වැඩි අවධානයක් යොමු වී ඇත. මානුෂීය අරමුදල් සැපයීම, නැගී එන ගෝලීය දකුණු ආර්ථිකයන්හි කාර්යභාරය, සහ කලාපීය සහයෝගීතාව හරහා ඖෂධ හා එන්නත් සඳහා ප්රවේශය වැඩිදියුණු කිරීම පිළිබඳව ද මෙහිදී පුළුල් ලෙස සාකච්ඡාවට ලක් විය.
මෙහිදී තරුණ පරපුර මානුෂීය ක්රියාකාරකම් සහ ගෝලීය සෞඛ්ය වෙත යොමු කරවීමේ අරමුණින් “Friends of MSF” නම් ශිෂ්ය සංවිධානයේ දේශීය ශාඛාවක් ද එළිදක්වා ඇති අතර, වෙනස් වන ගෝලීය අභියෝගවලට වඩාත් හොඳින් මුහුණ දිය හැකි නියෝජනයෙන් යුතු වගවීම් සහගත මානුෂීය පද්ධතියක් නිර්මාණය කිරීම මෙම සමුළුවේ මූලික අරමුණ වී තිබේ.
