මුම්බායි නුවරදී එකම පවුලේ සාමාජිකයන් සිව්දෙනෙකු හදිසියේ මියයාමේ සිද්ධිය සම්බන්ධයෙන් පැතිර ගිය තොරතුරු මේ වන විට වෙනත් මානයකට හැරී ඇත. මෙම පවුලේ පිරිස මියගියේ පැණි කොමඩු අනුභව කිරීම නිසා බවට සමාජ මාධ්ය ඔස්සේ සහ ප්රදේශය පුරා දැඩි කතාබහක් ඇති වූ අතර, එම පුවත නිසා මුම්බායි සහ ඒ අවට ප්රදේශවල පැණි කොමඩු මිල සීඝ්රයෙන් පහත වැටුණි. කෙසේ වෙතත්, නවතම අධිකරණ වෛද්ය වාර්තා පෙන්වා දෙන්නේ පැණි කොමඩු අනුභවය සහ මෙම මරණ අතර සෘජු සම්බන්ධයක් නොමැති බවත්, මෙය කිසියම් විෂ වර්ගයක් ශරීරගත වීමෙන් සිදු වූවක් බවත්ය.
මියගිය අය අතර 45 හැවිරිදි අබ්දුල්ලා ඩොකාඩියා, ඔහුගේ බිරිඳ නස්රීන් (35) සහ ඔවුන්ගේ දියණියන් දෙදෙනා වන සයිනබ් (13) සහ අයේෂා (16) වෙති. පසුගිය සෙනසුරාදා රාත්රියේ ඥාතීන් සමඟ ආහාර වේලක් ගැනීමෙන් පසු අලුයම 1:00 ට පමණ මෙම පවුල කොමඩු අනුභව කර ඇති අතර, අලුයම 5:00 වන විට ඔවුන් දැඩි ලෙස අසනීප වී තිබේ. වමනය සහ පාචනය වැනි රෝග ලක්ෂණ පෙන්නුම් කළ ඔවුන් පැය කිහිපයක් ඇතුළත මියගොස් ඇත.
මූලික පරීක්ෂණවලදී මියගිය අයගේ අභ්යන්තර ඉන්ද්රියයන් කොළ පැහැයට හැරී තිබීම වෛද්යවරුන්ගේ විශේෂ අවධානයට ලක්ව ඇත. සාමාන්ය ආහාර විෂ වීමකදී මෙවැනි තත්ත්වයක් ඇති නොවන බව පවසන වෛද්යවරුන්, පවුලේ ප්රධානියා වූ අබ්දුල්ලාගේ සිරුරේ මෝෆීන් (Morphine) නමැති ප්රබල වේදනා නාශකයක් අඩංගු වී තිබූ බව ද අනාවරණය කරගෙන ඇත. එදින රාත්රියේ ඔවුන් සමඟ ආහාර ගත් අනෙකුත් ඥාතීන් පස්දෙනාට කිසිදු රෝග ලක්ෂණයක් මතු නොවීම මෙම සිද්ධිය තවදුරටත් අභිරහසක් කර තිබේ. සිද්ධිය සම්බන්ධයෙන් පොලිසිය පුළුල් පරීක්ෂණ පවත්වන අතර, මියගිය අයගේ ශරීර කොටස් වැඩිදුර විද්යාත්මක පරීක්ෂණ සඳහා රසායනාගාර වෙත යවා ඇත.
