2007 ඔක්තෝම්බර් 25 වැනි දින පේරාදෙණිය විශ්වවිද්යාලයේ සනාථන මන්දිරයේ බිම් මහලේ නවතා තිබූ අංක CPNA 2613 දරණ ටොයොටා වර්ගයේ වෑන් රථය ගිනි ගෙන දැවී අළු වන අවස්ථාව වන විටත්, එකී වෑන් රථයේ යතුර ආරක්ෂක අංශ ප්රධාන කාර්යාලයේ යතුරු පුවරුවේ සුරක්ෂිතව තැන්පත් කර යතුරු පුවරුව අගුළු ලා තිබුණි. අදාළ වෑන් රථය නවතා තිබූ ස්ථානයට මීටර් 50ක පමණ දුරින් ආරක්ෂක නියාමක එම්. රණසිංහ බංඩා නැමැති නිලධාරියා රාජකාරියේ නිරතව සිට තිබුණි. එහෙත් සනාථන මන්දිරය දෙසින් ගින්නක් නැගෙන බව දුටු වෙනත් නේවාසිකාගාරයක රාජකාරියේ නිරතව සිටි නිලධාරියෙකු ආරක්ෂක කාර්යාලයට දැන්වීමෙන් පසුව, ඔවුන් සනාථන මන්දිරයට පැමිණෙන තෙක්ම රණසිංහ බංඩා නැමැත්තා වෑන් රථය ගිනි ගන්නා බව දැක තිබුණේ නැත. හොඳටම බීමත්ව නිදාගෙන සිට ඇති බව කියන අදාළ නිලධාරියා ඇහැරවා ඇත්තේද ප්රධාන කාර්යාලයෙන් පැමිණි නිලධාරියෙකු විසිනි.
ආරක්ෂක නිලධාරීන්, එම ස්ථානයට එකතු වූ සිසුන් ඇතුළු පිරිස සමග එක්ව ගිනි ගන්නා වෑන් රථය ආසන්නයේ නවතා තිබූ අනෙක් රථවාහන එම ස්ථානයෙන් ඉවත් කර ගින්න පැතිර යාම වැළැක්වීමට සමත් වුවද, ඒ වන විටත් බරපතල ලෙස ගිනි ගනිමින් තිබූ වෑන් රථය දෙස බලා සිටිනවා හැරෙන්නට වෙනත් යමක් කළ හැකිව තිබුණේ නැත. පැය කිහිපයක් ගතවන විට එම ස්ථානයේ තවදුරටත් වෑන් රථයක් ඉතිරිව තිබුණේ නැත. දැවී කළුපැහැගැන්වුණු වානේ සැකිල්ල පමණක් ඉතිරිව තිබුණි.
මහජන මුදලින් මිලදී ගත් වෑන් රථයක් අළු වී යන තෙක් කිසිවක් නොකර බලා සිටි බලධාරීන්, ඊට පසුදා උදෑසන සිට යුහුසුළුව පශ්චාත් පරීක්ෂණ ආරම්භ කිරීමට කටයුතු කළහ. අභ්යන්තර පරීක්ෂණ, පොලිස් පරීක්ෂණ මෙන්ම රක්ෂණ වන්දි ලබාගැනීමේ පරීක්ෂණයන්ට අමතරව, එවකට උපකුලපති මහාචාර්ය හරිශ්චන්ද්ර අබේගුණවර්ධනයන් පෞද්ගලිකවම මැදිහත්වෙමින් තොරතුරු දන්නා ඕනෑම අයෙකුට තම අනන්යතාවය හෙළිනොකර තොරතුරු ලබාදීමට උපකුලපති කාර්යාලයේ කෙටි දුරකථන අංකයක් හඳුන්වා දීමටද කටයුතු කළේය. අභ්යන්තර පරීක්ෂණයන්ට අදාළව සනාථන මන්දිර ආරක්ෂක මුරපොලේ රාජකාරියේ නිරතව සිටි ආරක්ෂක නියාමක එම්. රණසිංහ බංඩා නොහොත් “නවරියං” නැමැත්තා වහාම වැඩ තහනමකට ලක් කරනු ලැබීය. උපකුලපති කාර්යාලයේ කෙටි දුරකථන අංකය වෙත ගලා ආ තොරතුරු මෙන්ම මූලික විමර්ශනයේදී හෙළිදරව් වූ තොරතුරු කෙස් කෙලින් කරවන සුළු වූ අතර, ඒවා ඉදිරි කොටස්වලින් කියන්නට බලාපොරොත්තු වෙමු.
