මීගමුව බන්ධනාගාරයේ සිදුවූ නොසන්සුන්තාවයට අදාළව අපරාධ පරීක්ෂණ දෙපාර්තමේන්තුව (CID) විසින් මීගමුව මහේස්ත්රාත් අධිකරණයට වැදගත් තොරතුරු රැසක් අනාවරණය කර තිබේ. මේ වන විට බන්ධනාගාර නිලධාරීන් ඇතුළු 287 දෙනෙකුගෙන් ප්රකාශ ලබාගෙන ඇති අතර, සිද්ධියට සම්බන්ධ සැකකරුවන් හඳුනාගෙන ඔවුන්ට එරෙහිව මිනීමැරුම් චෝදනා, ගිනි අවි ආඥා පනත සහ පොදු දේපළ පනත යටතේ නඩු පැවරීමට කටයුතු කරන බව CID නිලධාරීන් අධිකරණයට දැනුම් දුන්නේය.
සිද්ධිය වන විට බන්ධනාගාරයේ සිටි සියලුම රැඳවියන්ගෙන් ප්රකාශ ලබා ගැනීමේ අවශ්යතාවය පෙන්වා දෙමින්, විවිධ බන්ධනාගාර වෙත මාරු කර යවා ඇති එම රැඳවියන්ගෙන් ප්රකාශ ලබා ගැනීමට අවශ්ය පියවර ගන්නා ලෙස බන්ධනාගාර කොමසාරිස් ජනරාල්වරයාට නියෝගයක් නිකුත් කරන ලෙස මහේස්ත්රාත්වරියගෙන් ඉල්ලා සිටින ලදී. මීට අමතරව, ඝාතන සඳහා යොදාගත් ගිනි අවි 60ක් ජීව උණ්ඩ සහිතව නඩු භාණ්ඩ කාමරයට භාර දී ඇති බවත්, රැඳවියන් විසින් විනාශ කරන ලද සී.සී.ටී.වී පද්ධතියේ දෘඩ තැටි (Hard Disks) දෙකක් වැඩිදුර පරීක්ෂණ සඳහා මොරටුව විශ්වවිද්යාලයේ පරිගණක අපරාධ අංශය වෙත යොමු කිරීමටත් අවසර ලබා ගත්තේය.
මේ අතර, කොළඹ ජාතික රෝහලේ ප්රතිකාර ලබමින් සිටි බන්ධනාගාර නිලධාරීන් දෙදෙනෙකු ද පසුගිය පැය කිහිපය තුළ ජීවිතක්ෂයට පත්වීමත් සමඟ මීගමුව බන්ධනාගාර සිද්ධියෙන් මියගිය මුළු සංඛ්යාව 31ක් දක්වා ඉහළ ගොස් ඇත. ඉන් නිලධාරීන් 10 දෙනෙකු සහ රැඳවියන් 21 දෙනෙකු ලෙස වාර්තා වේ. මියගිය බන්ධනාගාර නිලධාරියෙකුගේ හදවත් රෝගයකින් පෙළෙන කුඩා දරුවෙකු පිළිබඳ පුවතක් ද මේ වන විට වාර්තා වී ඇති අතර, විමර්ශනවල ප්රගතිය ලබන 16 වනදා අධිකරණයට ඉදිරිපත් කරන ලෙස මහේස්ත්රාත්වරිය නියෝග කළාය.
