නොරොච්චෝල ලක්විජය බලාගාරය වෙත රැගෙන ආ, සම්පූර්ණයෙන්ම ප්රතික්ෂේප කළ යුතු මට්ටමේ බාල ප්රමිතියෙන් යුතු ගල්අඟුරු අඩංගු ‘MV JOSCO YONGZHOU’ නැවේ ගොඩබෑම් කටයුතු අද (29) පෙරවරුවේ බලහත්කාරයෙන් ආරම්භ කර ඇති බව ‘ෆ්රී ලෝයර්ස්’ (Free Lawyers) සංවිධානය නිල වශයෙන් හෙළිදරව් කර සිටී. මෙම සමස්ත ක්රියාවලිය 2023 අංක 9 දරණ දූෂණ විරෝධී පනත යටතේ ඍජුවම දඬුවම් ලැබිය හැකි මහා පරිමාණ මංකොල්ලයක් බවට පත්ව ඇති බව පෙන්වා දෙන එම සංවිධානය, බලධාරීන්ගේ මෙම සිතාමතා සිදුකළ පැහැර හැරීම දැඩි විවේචනයට ලක් කර ඇත.
Taranjot Resource (Pvt) Ltd නම් සමාගම විසින් සපයනු ලබන, ගල්අඟුරු මෙට්රික් ටොන් 59,766.000ක් රැගත් මෙම විවාදාත්මක නැව ඊයේ (28) දහවල් 11.30ට පමණ පුත්තලම නැංගුරම් පොළට පැමිණ තිබේ. ඉන්පසු එදිනම සවස 3.30ට බලධාරීන්ගේ පරීක්ෂාවට ලක්වූ මෙම නැවට, කිසිදු විධිමත් සොයා බැලීමකින් තොරව විනාඩි 30ක් වැනි අතිශය කෙටි කාලයක් තුළ ගොඩබෑමේ අනුමැතිය ලබා දී ඇති බව ‘ෆ්රී ලෝයර්ස්’ සංවිධානය නිකුත් කළ නිවේදනයේ දැක්වේ. ඒ අනුව අද පෙරවරු 10.30ට කණ්ඩායම් හතරක් යොදවා මෙහි ගොඩබෑම් කටයුතු කඩිනමින් ආරම්භ කර තිබේ.
පසුගිය අප්රේල් 30 වන දින Bureau Veritas Solutions South Africa (Pvt) Ltd ආයතනය විසින් ලංකා ගල්අඟුරු සමාගම වෙත යොමු කරන ලද පැටවුම් වරාය වාර්තාව (Load Port Report) මඟින්ම මෙම නැවේ ඇති ගල්අඟුරු බාල ප්රමිතියෙන් යුතු බව කල්තියාම තහවුරු වී තිබූ බව නීතිඥ සංවිධානය පෙන්වා දෙයි. ලංකා ගල්අඟුරු සමාගමේ ටෙන්ඩර් ලියවිල්ලේ 5.2 කොටස අනුව උපරිම අළු ප්රතිශතය (LCC Reject Values) විය යුත්තේ ඒකක 16කි. නමුත්, දැනට බලහත්කාරයෙන් ගොඩබාමින් පවතින ගල්අඟුරුවල අළු ප්රතිශතය ඒකක 16.8ක් ලෙස ඉහළ අගයක සටහන්ව ඇත.
මේ හේතුවෙන්, පවතින නීතිමය රාමුවට අනුව මෙම ගල්අඟුරු තොගය දඩ මුදලක් අය කරගෙන හෝ මිලදී ගැනීමට ලංකා රජයට කිසිදු නෛතික හැකියාවක් නොමැති බව එම සංගමය අවධාරණය කරයි. අදාළ පැටවුම් වරාය වාර්තාව මත පදනම්ව ගොඩබෑම පවා සම්පූර්ණයෙන්ම ප්රතික්ෂේප කළ යුතු, ලංකා ඉතිහාසයේ පළමු සහ එකම ගල්අඟුරු නැව මෙය බවද ඔවුහු පවසති. මෙම තොගය ගොඩබෑමට පෙර ලංකා ගල්අඟුරු සමාගම, විගණන කාර්යාලය සහ තාක්ෂණික කමිටු මඟින් විධිමත් විමර්ශනයක් සිදු කරන ලෙස ඉල්ලා සිටියද බලධාරීන් ඊට කන් දී නැත. මෙවැනි බාල නිෂ්පාදනයක් වෙනුවෙන් මහජන මුදලින් ඉහළ පිරිවැයක් ගෙවීම බරපතළ අපරාධයක් මෙන්ම, රජයේ මුදල් හා පරිපාලන රෙගුලාසි සම්පූර්ණයෙන්ම උල්ලංඝනය කිරීමක් බැවින් මේ පිළිබඳව වහාම චෝදනා ගොනු කළ යුතු බව එම සංවිධානය වැඩිදුරටත් කියා සිටී.
