නීතිඥ ලාල් විජේනායකගේ සභාපතිත්වයෙන් යුතු, “ස්වාභාවික යුක්තියේ මූලධර්මය” පිළිබඳව නොදත් මූලික විමර්ශන කමිටුව, 2015 අගෝස්තු 06 වන දින සිය විමර්ශන කටයුතු ආරම්භ කර තිබෙන අතර 2015 නොවැම්බර් 19 දින සිය වාර්තාව පේරාදෙණිය විශ්වවිද්යාලයේ පාලක සභාව වෙත භාරදී තිබේ. ඉංග්රීසි භාෂාවෙන් සකස් කර තිබෙන මෙම වාර්තාවට කමිටු සභාපති ලෙස නීතිඥ ලාල් විජේනායක සහ සාමාජිකයන් ලෙස මහාචාර්ය ආර්. එල්. විජේවීර සහ ආචාර්ය එස්. බී. ඒකනායක යන අය අත්සන් තබා ඇත.
මෙම වාර්තාවේ මාතෘකාවෙහි සඳහන්ව තිබෙන්නේ ‘THE REPORT OF THE FACT FINDING COMMITTEE’ යනුවෙනි. ඊට අනුව එම කමිටුව කටයුතු කර තිබෙන්නේ තොරතුරු සොයා බැලීමේ කමිටුවක් හෙවත් මූලික විමර්ශන කමිටුවක් ලෙසටය.
විශ්වවිද්යාල ආයතන සංග්රහයට අනුව මෙන්ම රජයේ ආයතන සංග්රහයට අනුවද මූලික විමර්ශනයක් යනු චෝදනා එල්ල වන පුද්ගලයා සම්බන්ධයෙන් විනය ක්රියාමාර්ග ගැනීමට ප්රමාණවත් සාක්ෂි සහ කරුණු තිබේදැයි සොයා බලා වාර්තා කිරීමේ කටයුත්තකි. ප්රථමයෙන්ම බැලූ බැල්මට පෙනෙන නඩුවක් තිබේදැයි සොයා බැලීමෙන් පසුව චෝදනා පත්රයක් ගොනු කර, විධිමත් පරීක්ෂණයක් කැඳවා, ඉදිරිපත්ව ඇති චෝදනා ඔප්පු කිරීම සිදු කළ යුතුය.
ඒ අනුව මෙම මූලික විමර්ශන කමිටුව සිය විමර්ශනයේදී මූලිකව චෝදනා 04ක් සම්බන්ධයෙන් කරුණු විමසා බලා තිබූ අතර, විමර්ශන කටයුත්ත අතරවාරයේදී ඊට එක්කෙරුණු අතිරේක පස්වන චෝදනාවක් සම්බන්ධයෙන්ද කරුණු සොයා බලා තිබුණි. ඒ අනුව ඔවුන්ගේ රාජකාරිමය වපසරිය සීමාවී තිබුණේ අදාළ චෝදනා 05 සම්බන්ධයෙන් විධිමත් පරීක්ෂණයක් පැවැත්විය යුතුද නැතිද යන්න සම්බන්ධයෙන් නිර්දේශ ලබාදීමටය.
එහෙත් මෙම මූලික විමර්ශන කමිටුව සිය 2015 නොවැම්බර් 19 දිනැති වාර්තාවෙහි 10 වන පිටුවේ ‘Observations and Recommendations’ යටතේ සටහන් කර තිබෙන්නේ, ප්රධාන ආරක්ෂක නිලධාරීවරයා චෝදනාවලට අදාළ වැරදි සිදුකර තිබෙන බව තම අදහස බවයි.
ඉන් අනතුරුව අදාළ නිලධාරියා සිය සේවයේ පරිවාස කාලය ගත කරමින් සිටින බවත්, පරිවාස කාලය ගත කරන නිලධාරියෙකුගේ සේවය හේතු දැක්වීමකින් තොරව අවසන් කිරීමට හැකි බවත් විස්තර කරන මූලික විමර්ශන කමිටුව, ඊට අදාළ නීතිමය පසුබිම සම්බන්ධයෙන්ද කරුණු දක්වමින් නිර්දේශ කර ඇත්තේ විධිමත් පරීක්ෂණයක් පැවැත්වීමෙන් තොරව අදාළ නිලධාරියාගේ සේවය අවසන් කිරීමට විනය බලධාරියාට අවකාශ තිබෙන බවටය.
මෙම නිරීක්ෂණ සහ නිගමන සම්බන්ධයෙන් සලකා බැලීමේදී බැලූ බැල්මට පෙනී යන කාරණය නම්, මූලික විමර්ශන කමිටුව ප්රධාන ආරක්ෂක නිලධාරීවරයාගේ සේවය අවසන් කිරීම ඒකායන අරමුණ බවට පත්කර ගනිමින් සහ ඒ සඳහා පාලක සභාව පොලඹවමින් අදාළ නිර්දේශ ලියා තිබෙන බවය.
ඒ අනුව පැහැදිලි වන කාරණය නම්, මෙම මූලික විමර්ශන කමිටුව විචක්ෂණශීලී නොවන ක්රියාවක් බව මේ වන විට ඔප්පු වී තිබෙන සේවය අවසන් කිරීම සිදු කිරීම සඳහා වංක ලෙසත්, සද්භාවයෙන් තොරවත් පාලක සභාව පොලඹවමින් කටයුතු කර තිබෙන බවය.
– මතු සම්බන්ධයි
