හිටපු අමාත්ය බැසිල් රාජපක්ෂ මහතාට අයත් බවට රාවයක් පැවති, මේ වන විට රජයේ දේපළක් ලෙස පවතින මල්වානේ නිවස සහ ඉඩම සම්බන්ධ ගැටලුව පිළිබඳ අවසන් තීරණයක් ගැනීම අග්රාමාත්ය හරිනි අමරසූරිය මෙනෙවිය වෙත පවරා තිබේ. අදාළ භූමිය දැනට විශ්වවිද්යාල සිසුන් පිරිසක් විසින් බලෙන් අත්පත් කරගෙන සිටින අතර, එම සිසුන් සහ අග්රාමාත්යවරියගේ සම්බන්ධීකරණ ලේකම්වරුන් දෙදෙනෙකු අතර විශේෂ සාකච්ඡාවක් ඊයේ (15) සවස අධ්යාපන අමාත්යාංශයේදී පවත්වා ඇත.
එහිදී මල්වානේ නිවස සහිත භූමිය රාජ්ය විශ්වවිද්යාල පද්ධතිය වෙත අනිවාර්යයෙන්ම එක් කළ යුතු බව සිසුන් ඒකමතිකව ප්රකාශ කර තිබේ. කෙසේ වෙතත්, එවැනි ප්රතිපත්තිමය තීරණයක් තමන්ට තනිව ගත නොහැකි බැවින්, එය විෂය භාර ඇමතිනිය ද වන අග්රාමාත්ය හරිනි අමරසූරිය මෙනෙවිය වෙත පැවරිය යුතු බව සම්බන්ධීකරණ ලේකම්වරුන් ප්රකාශ කර ඇත. එම ප්රකාශයත් සමඟම එකඟතාවයකින් තොරව විශ්වවිද්යාල සිසුන් සාකච්ඡාව අතරමඟ නතර කර නැගිට පැමිණි බව ඊට සහභාගී වූ සිසුන් සනාථ කරයි.
