බන්ධනාගාර තුළ දිනෙන් දින ඉහළ යන දැඩි තදබදය සහ රැඳවියන්ට ඇප ලබා දීමේදී මතුවී ඇති බාධා පිළිබඳව බන්ධනාගාර දෙපාර්තමේන්තුව විසින් අධිකරණ අමාත්යාංශය වෙත හදිසි දැනුම්දීමක් කර තිබෙනවා. නියමිත වේලාවට වාර්තා නොලැබීම හේතුවෙන් බන්ධනාගාර පද්ධතිය තුළ බරපතළ ගැටලුකාරී තත්ත්වයක් උද්ගත වී ඇති බවයි වාර්තා වන්නේ.
වැඩබලන බන්ධනාගාර කොමසාරිස් ජනරාල් ප්රසාද් හේමන්ත මහතා පෙන්වා දී ඇත්තේ ප්රමාද වී ඇති රජයේ රස පරීක්ෂක වාර්තා හේතුවෙන් නීතිමය කටයුතු ප්රමාද වී රැඳවියන්ට ඇප ලබා දීමට බාධා මතුවී ඇති බවයි. මෙම ප්රමාදය නිසාම බන්ධනාගාර තුළ සීමාව ඉක්මවා රැඳවියන් රඳවා තැබීමට සිදුවී ඇති අතර, එයින් බන්ධනාගාර පද්ධතිය තුළ දැඩි ඉඩකඩ මඳබවක් හෙවත් තදබදයක් නිර්මාණය වී තිබෙනවා.
මේ වන විට දිවයින පුරා පිහිටි බන්ධනාගාරවල රැඳවියන් තිස් නම දහසකට අධික පිරිසක් රඳවා සිටීම බරපතළ තත්ත්වයක් බවයි පැවසෙන්නේ. මෙම තදබදය පාලනය කිරීම සඳහා, බන්ධනාගාරගතව සිටින මත්ද්රව්යවලට ඇබ්බැහි වූවන් කඩිනමින් ප්රතිකාර මධ්යස්ථාන වෙත යොමු කිරීමට අවශ්ය පියවර ගන්නා ලෙසටද අමාත්යාංශය වෙත වැඩිදුරටත් දැනුම් දී තිබෙනවා.
රස පරීක්ෂක වාර්තා ප්රමාද වීම සහ බන්ධනාගාර තදබදය සම්බන්ධයෙන් මේ වන විට සමාජ මාධ්ය සහ නීති ක්ෂේත්රය තුළද දැඩි කතාබහක් නිර්මාණය වී තිබෙනවා. නීතියේ ක්රියාපටිපාටිය පමාවීම හේතුවෙන් අහිංසක රැඳවියන් අනවශ්ය ලෙස සිරගෙවල්වල කාලය ගත කිරීමට සිදුවීම සම්බන්ධයෙන් බොහෝ දෙනෙක් කණස්සල්ල පළ කරමින් සිටිනවා.
