මහේස්ත්රාත් ඩබ්ලිව්.එම්.එම්.අයි. වාසල මහත්මිය විසින් සැකකරුට රුපියල් 25,000ක මුදල් ඇපයක් සහ රුපියල් ලක්ෂ දෙක බැගින් වූ ශරීර ඇප දෙකක් නියම කරන ලද අතර, ඔහුට විදේශ ගමන් තහනමක් ද පනවනු ලැබීය. අපරාධ පරීක්ෂණ දෙපාර්තමේන්තුව විසින් පසුගිය මාර්තු 27 වැනිදා මොහු අත්අඩංගුවට ගනු ලැබුවේ පාණදුර වලාන මධ්යම දූෂණ මර්දන ප්රහාරක ඒකකය මගින් සිදු කළ මූලික විමර්ශනයකට අදාළවය.
පොලිස් විමර්ශනවලදී අනාවරණය වී ඇත්තේ නීතිවිරෝධී ලෙස එකලස් කරන ලද කැබ් රථයක චැසි අංකය වෙනස් කිරීමට ව්යාජ ලේඛන සකස් කර බර සහතික ලබා ගැනීමට මොහු සහාය වී ඇති බවයි. අදාළ වාහනයේ නියමිත ලේඛන ගොනුව සඟවා තබමින් අසත්ය තොරතුරු ඉදිරිපත් කර මෙම වංචනික ක්රියාවට ආධාර සහ අනුබල දුන් බවට සැකකරුට එරෙහිව චෝදනා එල්ල වී තිබේ.
සැකකරු වෙනුවෙන් ජනාධිපති නීතිඥ කාලිංග ඉන්ද්රතිස්ස මහතා ඇතුළු නීතිඥ කණ්ඩායමක් අධිකරණයේ පෙනී සිටි අතර, නඩුව නැවත ලබන මැයි මස 11 වැනිදා කැඳවීමට නියමිතය. රජයේ උසස් නිලධාරියෙකු මෙවැනි චෝදනාවකට ලක්වීම සම්බන්ධයෙන් සමාජය තුළ දැඩි කතාබහක් නිර්මාණය වී ඇති අතර, මෝටර් රථ ප්රවාහන ක්ෂේත්රයේ පවතින මෙවැනි දූෂණ වැළැක්වීමට රජය දැඩි පියවර ගත යුතු බව බොහෝ පිරිස් පෙන්වා දෙති.
