මැතිවරණ සමයේදී ජාත්යන්තර මූල්ය අරමුදල (IMF) සමඟ ඇති කරගත් ගිවිසුම සංශෝධනය කරන බවට පොරොන්දු වූ ජාතික ජන බලවේගය, මේ වන විට එම පොරොන්දු සියල්ල අමතක කර රනිල් වික්රමසිංහ මහතාගේ ගිවිසුමටත් වඩා එහා ගිය අන්ත දක්ෂිණාංශික නව ලිබරල්වාදී වැඩපිළිවෙළක් ක්රියාත්මක කරමින් සිටින බව විපක්ෂ නායක සජිත් ප්රේමදාස මහතා පවසයි. පන්නල පැවැති ‘පච මදිවට හොරු’ මහජන කථිකාවට එක්වෙමින් ඔහු මේ බව සඳහන් කළේය.
IMF ඉලක්කයන්ටත් වඩා බදු අය කරමින් සහ ප්රාථමික ශේෂය අතිරික්තයක් දක්වා ඉහළ නංවමින් රජය ජනතාව දැඩි පීඩනයකට ලක් කර ඇති බවත්, එහි අරමුණ ‘IMF එකේ සුරතලා’ වෙමින් දේශපාලන වාසි ලබා ගැනීම බවත් විපක්ෂ නායකවරයා චෝදනා කළේය. එසේම, වත්මන් රජය ප්රජාතන්ත්රවාදී ව්යුහය විනාශ කරමින් අධිකරණය රජයේ අතකොළුවක් කර ගැනීමට උත්සාහ දරන බවත්, විනිසුරුවරුන්ගේ විශ්රාම වයස ඉහළ දැමීමට සහ පුරප්පාඩු සම්පූර්ණ නොකිරීම වැනි ක්රියා හරහා අධිකරණයට බලපෑම් කිරීමට සැරසෙන බවත් ඔහු පෙන්වා දුන්නේය.
ගොවි ජනතාවට සහන ලබා දෙන බවට මැතිවරණ සමයේ පොරොන්දු වුවත්, වී කිලෝවක නිෂ්පාදන වියදම රු. 137ක් ලෙස පවතිද්දී ගොවියාට රු. 120ක් වැනි මිලක් ලබා දෙමින් රු. 17ක පාඩුවක් සිදු කර ඇති බවත් ඔහු වැඩිදුරටත් කියා සිටියේය. මීට අමතරව, අධ්යාපන ක්ෂේත්රයේ පවතින අර්බුද සහ ඉතිහාසය වැනි හර විෂයන් අතහැර දැමීම වැනි ප්රතිපත්තිමය වැරදි හේතුවෙන් මෙම රජය සෑම අංශයකින්ම අසාර්ථක “පටලවා ගත්” ආණ්ඩුවක් බවට පත්ව ඇති බවද විපක්ෂ නායක සජිත් ප්රේමදාස මහතා අවධාරණය කළේය.
