මාධ්‍ය සහ අධිකරණය සෙල්ලමට ගනිමින් ප්‍රජාතන්ත්‍රවාදයේ නාමයෙන් ආණ්ඩුවේ මැති ඇමතිවරු කටයුතු කරමින් සිටින බව විපක්ෂ නායක සජිත් ප්‍රේමදාස මහතා පවසයි.
විපක්ෂනායකවරයා මේ බව පැවසුවේ සමස්ත ලංකා බිත්තර නිෂ්පාදකයින්ගේ සංගමය අද (24) කොළඹ විපක්ෂ නායක කාර්යාලයේදී පැවැති හමුවකදිය.
ඇතැම් මන්ත්‍රීවරු අධිකරණයට බරපතළ ලෙස අපහාස කරන බවත් ප්‍රේමදාස මහතා පැවසිය.
රංජන් රාමනායකට එක නීතියකුත්, ආණ්ඩුවේ ඇතැම් මන්ත්‍රීවරුන්ට තව නීතියකුත් ක්‍රියාත්මක වන තත්ත්වයට පත්ව ඇති බව පැවසූ විපක්ෂ නායකවරයා අධිකරණය සහ මාධ්‍ය ඉලක්ක කර ගනිමින් සිදුකරන මේ අපහාසාත්මක තර්ජනාත්මක කටයුතු වහා නතර කළ යුතුව ඇතැයිද පැවසීය.
ආණ්ඩුව විසින් සිදුකරනු ලබන ප්‍රජාතන්ත්‍ර ප්‍රජාතන්ත්‍ර විරෝධී මර්ධනයට එරෙහිව විපක්ෂය තුළ බලවේග පාරට බැසීමේ තත්ත්වයට පත් නොකරන ලෙස ඉල්ලා සිටි විපක්ෂ නායකවරයා මේ මොහොතේ රට ගොඩනගන්නට පාර්ලිමේන්තු කමිටු ක්‍රමය හරහා සහයෝගය ලබා දෙන්නේ රටේ පොදු ජනතාව ගැන සිතමින් බවද පැවසීය.
ආණ්ඩුවේ ඇතැම් මන්ත්‍රීවරුන්ගේ හැසිරීම පවා පාලනය කරන ලෙස ඉල්ලා සිටි විපක්ෂ නායකවරයා එය එසේ නොකරන්නේ නම් ඊට එරෙහිව ක්‍රියාත්මක වන බවද පැවසීය.
