ඇමෙරිකාව සහ ඊශ්රායලය ඉරානය සමඟ පවතින යුදමය වාතාවරණය හේතුවෙන් ගෝලීය බලශක්ති වෙළඳපොළේ ඇති වී තිබෙන දැඩි අස්ථාවරත්වය හමුවේ ශ්රී ලංකාව බොරතෙල් බැරලයක් සඳහා ඇමෙරිකානු ඩොලර් 286ක අතිවිශාල මුදලක් ගෙවා ඇති බව අනාවරණය වේ. HSBC බැංකුවේ ප්රධාන විධායක නිලධාරී ජෝර්ජ් එල්හෙඩ්රි මහතා හොංකොං හි පැවති ආයෝජන සමුළුවකදී මෙම තොරතුරු හෙළි කර ඇති අතර මෙය ලෝක වෙළඳපොළේ පවතින සාමාන්ය මිල මට්ටම්වලට වඩා ඉතා ඉහළ අගයකි. බටහිර වෙළඳපොළේ බොරතෙල් මිල බැරලයකට ඩොලර් 100-110 අතර පවතින බව පෙනෙන්නට තිබුණ ද මැදපෙරදිගින් තෙල් ලබාගන්නා ආසියානු රටවලට ප්රවාහන හා රක්ෂණ ගාස්තු ඉහළ යාම නිසා සැබෑ පිරිවැය ඩොලර් 140-150 දක්වා ඉහළ ගොස් ඇතත් ශ්රී ලංකාව ගෙවා ඇති මෙම මිල එල්හෙඩ්රි මහතා පෙන්වා දෙන්නේ තමන් අසා ඇති ඉහළම මිල ලෙසයි.
හෝමුස් සමුද්ර සන්ධිය හරහා තෙල් ප්රවාහනය සීමා වීම, නාවික රක්ෂණ ගාස්තු 5% දක්වා ඉහළ යාම සහ යුද අවදානම් රක්ෂණ අහෝසි වීම මෙම මිල ගණන් සීඝ්රයෙන් ඉහළ යාමට ප්රධාන හේතු වී තිබේ. පවතින මෙම ගෝලීය අර්බුදය හමුවේ ශ්රී ලංකාව මීට පෙර ද ඉන්ධන මිල 25% කින් පමණ ඉහළ දැමූ අතර පවතින තත්ත්වය හමුවේ රුසියාව වැනි විකල්ප මූලාශ්ර හරහා සහනදායී මිලට ඉන්ධන ලබාගැනීමට රජය තවදුරටත් සාකච්ඡා පවත්වමින් සිටියි. ගෝලීය තෙල් මිල විකෘතිය හමුවේ මෙරට ආර්ථිකයට එල්ල වන මෙම පීඩනය ඉදිරි කාලසීමාව තුළ තවදුරටත් තීරණාත්මක වනු ඇත.
