ශ්රී ලංකාවේ අපනයන ක්ෂේත්රය නව මාවතකට ගෙන යමින්, 2026-2030 ජාතික අපනයන සංවර්ධන සැලැස්ම (NEDP) සාර්ථක කර ගැනීම සඳහා ශ්රී ලංකා රේගුවේ දැවැන්ත ප්රතිසංස්කරණ රැසක් ක්රියාත්මක කිරීමට තීරණය කර ඇත. ජනාධිපති ලේකම් ආචාර්ය නන්දික සනත් කුමානායක මහතාගේ ප්රධානත්වයෙන් පැවති විශේෂ සාකච්ඡාවකදී මෙම තීරණ ගෙන තිබේ.
මෙම නව වැඩපිළිවෙළ යටතේ අපනයන බහලුම් පරීක්ෂා කෙරෙන මධ්යස්ථානවල ධාරිතාව සහ පහසුකම් වහාම වැඩි දියුණු කිරීමටත්, TIEP ක්රියාවලිය සමාලෝචනය කර කුඩා හා මධ්ය පරිමාණ ව්යවසායකයන් අපනයන ක්ෂේත්රයට යොමු කිරීමටත් තීරණය කර ඇත. මීට අමතරව අපනයන මධ්යස්ථාන දිවයින පුරා ව්යාප්ත කරමින් යාපනය ප්රදේශයේ ද නව මධ්යස්ථානයක් පිහිටුවීමට සහ තැපැල් දෙපාර්තමේන්තුව හා එක්ව ඊ-වාණිජ්ය අපනයන බාධාවන් ඉවත් කිරීමටත් අවධානය යොමු කෙරිණි. එමෙන්ම ලිපි ලේඛන කටයුතු ඩිජිටල් ක්රමවේදවලට යොමු කරමින් කාලය සහ පිරිවැය අවම කිරීමට ද පියවර ගෙන ඇත.
‘පොහොසත් රටක් – ලස්සන ජීවිතයක්’ යන ජාතික දැක්ම යටතේ, 2030 වන විට ඇමරිකානු ඩොලර් බිලියන 36ක අපනයන ආදායම් ඉලක්කය සපුරා ගැනීම සඳහා මෙම පියවර ගෙන ඇති බව රජය සඳහන් කරයි. මෙම කටයුතු මාසිකව සමාලෝචනය කිරීමටත්, අපනයනකරුවන්ගේ ගැටලු නිරාකරණයටත් විශේෂ ඒකාබද්ධ කණ්ඩායමක් පත් කර ඇත.
