පලස්තීනයේ නව ශ්රී ලංකා තානාපතිවරයා ලෙස පත්කරුණු ලැබූ මොහොමඩ් ෆාරුක් මොහොමඩ් ෆවුසර් මහතා, රමල්ලාහි පිහිටි ජනාධිපති මන්දිරයේදී පලස්තීන ජනාධිපති මහමුද් අබ්බාස් මහතා වෙත සිය අක්තපත්ර නිල වශයෙන් භාර දී තිබේ. ජනාධිපති මන්දිරය වෙත පැමිණි නව තානාපතිවරයා වෙනුවෙන් උත්තමාචාර මුරයක් ඇතුළු හමුදා ගෞරව සහිත උත්සවයක් පවත්වා ඇත.
අක්තපත්ර භාරදීමෙන් අනතුරුව පැවැති විශේෂ සාකච්ඡාවේදී, ශ්රී ලංකා ජනාධිපති අනුර කුමාර දිසානායක මහතාගේ උණුසුම් සුභාශිංසන පලස්තීන ජනාධිපතිවරයා වෙත පිරිනැමූ තානාපතිවරයා, දෙරට අතර පවතින දීර්ඝකාලීන මිත්රත්වය සහ සහයෝගීතාව තවදුරටත් ශක්තිමත් කිරීමට ශ්රී ලංකාව දක්වන කැපවීම යළි තහවුරු කළ බව විදේශ කටයුතු අමාත්යාංශය පවසයි.
මෙහිදී අදහස් දක්වමින් තානාපති ෆවුසර් මහතා, පලස්තීන ජනතාවගේ අහිමි කළ නොහැකි අයිතිවාසිකම් වෙනුවෙන් ශ්රී ලංකාවේ නොසැලෙන සහය පළ කළේය. එමෙන්ම 1967 දේශසීමා පදනම් කරගත් ද්වි-රාජ්ය විසඳුමක් (Two-State Solution) සඳහා වන එක්සත් ජාතීන්ගේ මහා මණ්ඩල යෝජනා ක්රියාත්මක කිරීමට ශ්රී ලංකා රජය දක්වන නිරන්තර සහයෝගයද ඔහු මෙහිදී යළිත් අවධාරණය කර තිබේ.
