ලක්වැසි ජනතාවගේ රෝග වළක්වා ගැනීමේ ප්රජා මූලික සෞඛ්ය ක්රමවේදයේ (Preventive Healthcare) සහ මෙරට සෞඛ්ය වෛද්ය නිලධාරි (MOH) ක්රමවේදයේ මූලාරම්භය වූ කළුතර ජාතික සෞඛ්ය විද්යායතනය (NIHS) අද (01) සිය අභිමානවත් 100 වැනි සංවත්සරය (Centenary Congress) සනිටුහන් කරයි. මේ වෙනුවෙන් සංවිධානය කර ඇති ප්රධාන සැමරුම් මහෝත්සවය අද පස්වරු 4:00ට අග්රාමාත්ය ආචාර්ය හරිනි අමරසූරිය මහත්මිය සහ සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ඇතුළු සම්භාවනීයන් රැසකගේ සහභාගිත්වයෙන් කළුතර පිහිටි එම විද්යායතන ශ්රවණාගාරයේදී පැවැත්වේ.
රොක්ෆෙලර් පදනමේ සහයෝගීතාවෙන් 1926 ජූලි 1 වැනි දින ආසියාවේ ප්රථම සෞඛ්ය ඒකකය ලෙස වෛද්ය එස්. එෆ්. චෙල්ලප්පා සහ වෛද්ය ඩබ්. පී. ජැකොක්ස් යන මහත්වරුන්ගේ නායකත්වයෙන් මෙය ආරම්භ විය. 1979 දී ‘ජාතික සෞඛ්ය විද්යායතනය’ ලෙස ප්රතිසංවිධානය වූ මෙරට මහජන සෞඛ්ය පරීක්ෂකවරුන් (PHI) සහ පවුල් සෞඛ්ය සේවා නිලධාරිනියන් (PHM) පුහුණු කරන ප්රධානතම ජාතික මධ්යස්ථානය වන අතර, එය 2012 වසරේදී ලෝක සෞඛ්ය සංවිධානයේ (WHO) නිල සහයෝගිතා මධ්යස්ථානයක් ලෙසද ප්රකාශයට පත් කෙරිණි.
අද දින පැවැත්වෙන ශත සංවත්සර උලෙළේදී විශේෂ සමරු මුද්දරයක් සහ මුල් දින කවරයක් නිකුත් කිරීමටත්, ආයතනයේ වසර 100ක ගමන් මඟ ඇතුළත් ‘Legacy of a Centenary’ සුවිශේෂී ග්රන්ථය එළිදැක්වීමටත් කටයුතු යොදා ඇත. මෙයට සමගාමීව ජූලි මාසය පුරා විද්වත් පර්යේෂණ සාකච්ඡා, විශේෂ පා ගමනක්, සෞඛ්ය වෘත්තිකයන්ගේ ක්රිකට් තරගාවලියක්, මහජන ප්රදර්ශනයක් මෙන්ම නවීකරණය කරන ලද NIHS කෞතුකාගාරය විවෘත කිරීම ද සිදුකෙරෙන බව විද්යායතනයේ අධ්යක්ෂ වෛද්ය කේ. නන්තකුමාරන් මහතා සඳහන් කරයි.
