දිවයින පුරා පිහිටි පොලිස් ස්ථාන වෙත දිනපතාම ජංගම දුරකථන අස්ථානගතවීම් සහ සොරකම් කිරීම් සම්බන්ධයෙන් පැමිණිලි විශාල ප්රමාණයක් ලැබෙන බව ශ්රී ලංකා පොලිසිය පවසයි. මෙලෙස අස්ථානගත වන දුරකථන සොරකම් කරන පුද්ගලයන් හෝ වෙනත් පාර්ශවයන් අතට පත්වීමෙන්, ඒවා විවිධ සමාජ විරෝධී, නීතිවිරෝධී සහ අපරාධ ක්රියාවන් සඳහා යොදාගැනීමේ වරදකරුවන්ට දොරටු විවෘත වන බව පොලිස් මාධ්ය ප්රකාශක කාර්යාලය අනතුරු අඟවයි. විශේෂයෙන්ම ජංගම දුරකථන සන්තකයේ පවතින බැංකු තොරතුරු, පෞද්ගලික දත්ත, ඡායාරූප සහ රහස්ය තොරතුරු උපයෝගී කරගනිමින් වංචා සහ විවිධ හිංසන සිදුකිරීමට අපරාධකරුවන් පෙළඹෙන බැවින් දුරකථනයක් අහිමි වූ වහාම පියවර කිහිපයක් අනුගමනය කිරීම අත්යවශ්ය වේ.
ඒ අනුව අදාළ සේවා සපයන සමාගම අමතා සිම් පත වහාම අක්රීය කිරීමට පියවර ගත යුතු අතර එමඟින් වෙනත් අයෙකුට ඔබේ දුරකථන අංකය භාවිත කර නීතිවිරෝධී ක්රියා සිදුකිරීම වැළැක්විය හැකිය. එමෙන්ම පොලිසියට පැමිණිල්ලක් ඉදිරිපත් කිරීමේදී දුරකථනයේ ජාත්යන්තර ජංගම උපකරණ අනන්යතා හෙවත් IMEI අංකය ලබාදීම අනිවාර්ය වන අතර ජංගම දුරකථනයේ *#06# ඇතුළත් කිරීමෙන් එය කලින්ම ආරක්ෂිතව සටහන් කර තබා ගැනීම පරිශීලකයාගේ වගකීමකි.
අස්ථානගත වූ දුරකථන සෙවීම සඳහා ශ්රී ලංකා පොලිසිය විසින් හඳුන්වා දී ඇති මෘදුකාංග පද්ධතියක් සහිත ineed.police.lk
නිල වෙබ් අඩවියට පිවිස තොරතුරු ලියාපදිංචි කිරීමෙන් පොලිසිය මඟින් කඩිනම් විමර්ශන ආරම්භ කරනු ලබයි.
නීතිමය ප්රතිවිපාක සලකා බැලීමේදී, තමන්ට අයිති නැති දුරකථනයක් හමු වූ විට වහාම ළඟම ඇති පොලිස් ස්ථානයට භාර දී රිසිට්පතක් ලබාගත යුතු අතර එසේ නොකර ළඟ තබා ගැනීම ලංකා දණ්ඩ නීති සංග්රහය යටතේ අන්සතු දේ සාපරාධී ලෙස පරිහරණය කිරීමේ වරදක් වන බැවින් ඒ සඳහා වසර දෙකක් දක්වා සිරදඬුවම් හිමිවිය හැකිය. එමෙන්ම සොරකම් කරන ලද භාණ්ඩයක් බව දැන දැනම අඩු මිලට ජංගම දුරකථන මිලදී ගෙන ළඟ තබා ගන්නා පුද්ගලයන්ට වසර තුනක් දක්වා සිරදඬුවම් නියම කළ හැකිය. නව හෝ පාවිච්චි කරන ලද ජංගම දුරකථනයක් මිලදී ගැනීමට පෙර, “I Need” පද්ධතියේ ඇති “Find Genuine Phone” විශේෂාංගය ඔස්සේ එම දුරකථනය පොලිසියට පැමිණිලි කරන ලද එකක් දැයි පරීක්ෂා කර බලන ලෙස ද පොලිසිය මහජනතාවට වැඩිදුරටත් දැනුම් දෙයි.
