2018 අංක 35 දරන මුදල් පනත සංශෝධනය කිරීම සඳහා අමාත්‍ය මණ්ඩලයේ අනුමැතිය හිමිව තිබේ. මෙම සංශෝධනය හරහා මෙරට සන්නිවේදන ක්ෂේත්‍රයේ යටිතල පහසුකම් වර්ධනය කිරීම සඳහා විශේෂ බදු සහනයක් හඳුන්වා දීමට රජය තීරණය කර ඇත. මුදල්, ක්‍රම සම්පාදන සහ ආර්ථික සංවර්ධන අමාත්‍යවරයා ලෙස ජනාධිපතිවරයා ඉදිරිපත් කළ මෙම යෝජනාවට අනුව අදාළ පනත් කෙටුම්පත රජයේ ගැසට් පත්‍රයේ පළ කිරීමෙන් අනතුරුව පාර්ලිමේන්තුවට ඉදිරිපත් කිරීමට නියමිතය.
වත්මන් නීතියට අනුව, දුරකථන සන්නිවේදන කුලුනු හිමි ජංගම දුරකථන ක්‍රියාකරුවන්ගෙන් එක් කුලුනක් සඳහා වාර්ෂිකව රුපියල් 200,000ක බදු මුදලක් අය කරනු ලැබේ. එහෙත් 2026 අයවැය යෝජනාවලට අනුව, 2026 ජනවාරි 01 දින හෝ ඉන් පසුව අලුතින් ඉදි කරනු ලබන සන්නිවේදන කුලුනු සඳහා ඉදිරි වසර 5ක කාලයක් යන තෙක් මෙම බද්ද අය නොකිරීමට තීරණය කර ඇත. නීතිපතිවරයාගේ නිෂ්කාශනය ද ලැබී ඇති මෙම නව සංශෝධනය මඟින් දුරස්ථ ප්‍රදේශවල සන්නිවේදන පහසුකම් ව්‍යාප්ත කිරීමට සන්නිවේදන සමාගම් දිරිමත් කිරීම රජයේ අපේක්ෂාවයි.
