මැදපෙරදිග කලාපයේ පවතින යුදමය නොසන්සුන්තාව හේතුවෙන් යුරෝපීය සංචාරකයන්ගේ පැමිණීම අඩුවීමේ අවදානම සැලකිල්ලට ගනිමින් ශ්රී ලංකා සංචාරක ප්රවර්ධන කාර්යාංශය ආසියානු කලාපය කේන්ද්ර කරගත් නව උපායමාර්ගික වැඩපිළිවෙළක් ප්රකාශයට පත් කර තිබේ. මෙම වසර තුළ චීන සංචාරකයන් ලක්ෂ 3ක් මෙරටට ආකර්ෂණය කර ගැනීම රජයේ මූලික ඉලක්කය වී ඇති අතර ඒ හරහා යුරෝපීය වෙළෙඳපොළෙන් සිදුවන පාඩුව පියවා ගැනීමට අපේක්ෂිතය.
සංචාරකයන්ගේ මූල්ය ගනුදෙනු පහසු කිරීම සඳහා ඩිජිටල් ගෙවීම් පද්ධතිවල පවතින අඩුපාඩු මඟහරවා ගැනීමට ද රජය පියවර ගනිමින් සිටින අතර විශේෂයෙන්ම ඉන්දියානු සහ චීන සංචාරකයන් බහුලව භාවිතා කරන QR කේත පදනම් කරගත් ගෙවීම් ක්රමවේද මෙරට බැංකු පද්ධතිය සමඟ වඩාත් කාර්යක්ෂමව සම්බන්ධ කිරීමට සැලසුම් කර ඇත. මීට අමතරව හෝමුස් සමුද්ර සන්ධියේ පවතින තත්ත්වය නිසා ගුවන් ගමන් මාර්ගවල සිදුවන වෙනස්වීම් සැලකිල්ලට ගනිමින් ආසියානු කලාපීය ගුවන් සේවා සමඟ සෘජු ගුවන් ගමන් වාර ඉහළ නැංවීමට ද සාකච්ඡා ආරම්භ කර ඇති බව වාර්තා වේ.
