ආණ්ඩුව සැලසුම් කරන බිලියන 1700 ක ආදායම ලබාගැනීමට වැට් බද්ද වැඩි කිරීම හරහා සිදුකිරීමට නොහැකි බව පාර්ලිමේන්තු මන්ත්රී තිස්ස අත්තනායක මහතා පවසයි.
මන්ත්රීවරයා මේ බව පැවසුවේ ඊයේ (11) දින කොළඹ විපක්ෂ නායක කාර්යාලයේ දී පැවැති මාධ්ය හමුවකදීය.
ආණ්ඩුව අපේක්ෂා කරන ආදායම ලබා ගැනීමට අනිවාර්යෙන් ජනවාරි මාසයේ වැට් බද්දේ ප්රතිශතය නැවත වැඩි කිරීමට ආණ්ඩුව කටයුතු කරන බවත් ඒ අනුව අවම වශයෙන් 2024 දී වැට් බද්ද නැවත සියයට 25 ක් දක්වා වැඩි කරන්න ආණ්ඩුවේ සැලසුමක් ඇති බව මන්ත්රීවරයා පැවැසීය.
රජයට ආදායම් සොයාගැනීමට තිබෙන එකම ක්රමය වැට් බද්ද සියයට 18 ක් දක්වා වැඩි කිරීම නොවන බවත් ආණ්ඩුව වෙනත් ආදායම් මාර්ග පිළිබඳ සිතිය යුතු බවත් ආණ්ඩුවේ වියදම් පාලනය නොකර මහජනතාව පීඩාවට පත් කරමින් ආදායම ගැන විතරක් සිතන ආණ්ඩුවක් ජනතාව ගැන සිතයිද කියන ගැටලුව මතුවන බවත් තිස්ස අත්තනායක මහතා සඳහන් කළේය.
ජාත්යන්තර මූල්ය අරමුදලේ අධ්යක්ෂ මණ්ඩලය සතුටු කරන්න සහ ජාත්යන්තර මූල්ය අරමුදලේ දෙවැනි වාරිකය ලබාගන්න රටේ ජනතාවගේ ආදායම උදුරාගැනීම සමගි ජනබලවේගය ප්රමුඛ විපක්ෂය අනුමත නොකරන බවත් ආණ්ඩුවට ජීවත් වෙන්න ජනතාවගේ සාක්කුවට තට්ටු කිරීම මගින් සිදුවෙන්නේ මිනිස්සුන්ගේ දුප්පතකම වැඩිවීම බවත් හෙතෙම පැවසිය.
