English 
TNA වැඩ ගැන අගමැතිගෙන් විවේචනයක්
දෙමළ ජාතික සන්ධානය උතුරේ ජනතාවගේ සැබෑ ප්‍රශ්නවලට විසඳුම් ලබාදීම වෙනුවට දේශපාලන වාසි ලබා ගැනීමේ අරමුණින් පමණක් කටයුතු කළ බව අග්රාමාත්ය මහින්ද රාජපක්ෂ පවසයි.
ඒ අද (01) පෙරවරුවේ අරලියගහ මන්දිරයේ දී දෙමළ මාධ්‍යවේදීන් සමග පැවති සාකච්ඡාවකදීය.
එසේම අග්‍රාමාත්‍යවරයා පවසා සිටියේ තම රජය සමයේ සිදුකළ සංවර්ධන ව්‍යාපෘති හැරුණු කොට පසුගිය යහපාලන රජය උතුරු – නැගෙනහිර ජනතාව වෙනුවෙන් කිසිදු සංවර්ධන ව්‍යාපෘතියක් ක්‍රියාත්මක නොකළ බවය.
රටේ සංවර්ධනය සහ ජන ජීවිතය නංවාලීම සඳහා ව්‍යාපෘති ක්‍රියාත්මක කිරීමේ දී උතුර සහ දකුණ ලෙස කිසිදු වෙනසක් නොමැති බව ද අග්‍රාමාත්‍යවරයා පැවසීය.
1977 වසරෙන් පසුව උතුරු, නැගෙනහිර පළාත්වල 2005 – 2010 කාලයේ දී සංවර්ධන ව්‍යාපෘති රැසක් ක්‍රියාත්මක කළ බව අග්‍රාමාත්‍යවරයා මෙහි දී සඳහන් කර සිටියේය.
එමෙන්ම එම පළාත්වල ජන ජීවිතය යහපත් තත්ත්වයට පත් කිරීමට සැලසුමකින් යුතුව ආණ්ඩුව කටයුතු කළ බව ද අග්‍රාමාත්‍යවරයා මෙහිදී සිහිපත් කර ඇත.
උතුරේ ජනතාව මුහුණ දෙන ප්‍රධාන ගැටලුවක් වන පානීය ජල ගැටලුව විසඳීම සඳහා තම රජය ප්‍රමුඛතාව ලබාදෙන බව සඳහන් කර ඇති අග්‍රාමාත්‍යවරයා ඒ සඳහා සැලසුම් සකස් කර ඇති බව ද සඳහන් කළේය.