අමෙරිකාවේ පෙන්සිල්වේනියා ප්රාන්තයේ පදිංචි ඉන්දීය සම්භවයක් සහිත සහෝදරයන් දෙදෙනෙකු වන භාස්කර් සවානි (Bhaskar Savani) සහ අරුන් සවානි (Arun Savani) වීසා වංචා, සෞඛ්ය සේවා වංචා සහ මුදල් විශුද්ධිකරණය ඇතුළු චෝදනා රැසකට වැරදිකරුවන් වී තිබේ. මොවුන් දෙදෙනාට පිළිවෙළින් වසර 420ක සහ වසර 415ක උපරිම සිරදඬුවම් නියම වීමේ අවදානමක් පවතින බව අමෙරිකානු බලධාරීන් ප්රකාශ කරයි.
වීසා වංචාව යටතේ බොරු තොරතුරු ඇතුළත් H-1B වීසා අයදුම්පත් ඉදිරිපත් කරමින් ඉන්දියාවෙන් ශ්රමිකයන් ගෙන්වාගෙන ඇති අතර එම ශ්රමිකයන්ගේ වැටුපෙන් කොටසක් නැවත ලබාගැනීමට ද මොවුන් කටයුතු කර ඇත. මීට අමතරව අමෙරිකානු රජයේ මෙඩිකේඩ් (Medicaid) සෞඛ්ය වැඩසටහන ඉලක්ක කරගනිමින් සිදුකළ මූල්ය වංචා, බදු පැහැර හැරීම් සහ නීතිවිරෝධී ලෙස උපයන මුදල් විශුද්ධිකරණය කිරීමේ චෝදනා ද මොවුන්ට එල්ල වී තිබේ. මෙම අපරාධ ජාලය හරහා ඔවුන් වසර ගණනාවක් තිස්සේ ඩොලර් මිලියන ගණනක මුදලක් උපයා ඇති බව අමෙරිකානු නීති දෙපාර්තමේන්තුව පවසයි.
