නූතන ජීවන රටාවේ පවතින දැඩි පීඩනය සහ කායික රෝගාබාධ හමුවේ ලාංකීය ජනතාව දැඩි සෞඛ්යමය තර්ජනයකට මුහුණ දී සිටින වටපිටාවක ඊයේ (25) ගාලු මුවදොර පරිශ්රය අසාමාන්ය නිශ්ශබ්දතාවයකින් සහ ශක්තියකින් පිරී ගියේය. හුදු ව්යායාමයකින් එහා ගිය මනස සහ ශරීරය අතර පවතින ගැටුම නිරාකරණය කරන අතිශය බලගතු සටන් කලාවක් කොළඹ හදවතේදී දිගහැරුණේ මින් පෙර කිසිදා නොවූ විරූ ආකාරයට මහජන අවධානය ඒ වෙත දිනා ගනිමිනි.
ජාත්යන්තර තායිචි (Tai Chi) දිනය නිමිත්තෙන් සංවිධානය වූ මෙම විශේෂ වැඩසටහන තරුණ කටයුතු හා ක්රීඩා අමාත්ය සුනිල් කුමාර ගමගේ මහතාගේ ප්රධානත්වයෙන් පැවැත්වුණු අතර ශ්රී ලංකාවේ චීන තානාපතිවරයා ඇතුළු සම්භාවනීය අමුත්තන් රැසක් ඊට එක්ව සිටියහ. තරුණ කටයුතු හා ක්රීඩා අමාත්යාංශය, චීන තානාපති කාර්යාලය සහ බස්නාහිර පළාත් සභාව ඒකාබද්ධව මෙය සංවිධානය කළේ සිරුරේ සෞඛ්යය වර්ධනය කරමින් මනසට උපරිම සහනය ලබාදෙන මේ පැරණි චීන සටන් ක්රමය ලාංකීය ජනතාව අතරට රැගෙන යාමේ අරමුණෙනි.
“සෑම දෙයක්ම සහජීවනයෙන්” (All Things in Harmony) යන තේමාව පෙරදැරි කරගත් මෙම වැඩසටහන හුදෙක් උත්සවයකට සීමා නොවී නිරෝගී දිවිපෙවතක් වෙනුවෙන් අලුත් මාවතක් විවර කළ බව නොඅනුමානය. ලාංකීය ජන සමාජය තුළ මනසේ සහනය සහ කායික ශක්තිය වර්ධනය කිරීමේ මෙම ගෝලීය ප්රවණතාවය ප්රචලිත කිරීම තුළින් වඩාත් සුවපත් හෙට දවසක් නිර්මාණය වන බවට වූ පොරොන්දුව එදින ගාලු මුවදොර සුළඟ සමඟ මුසු විය.
