ශ්රී ලංකා බැඩ්මින්ටන් සංගමයට අනුබද්ධිත, වසර 50කට වැඩි ඉතිහාසයක් ඇති බස්නාහිර පළාත් බැඩ්මින්ටන් සංගමය (WPBA), මෙරට බැඩ්මින්ටන් ක්රීඩාව තවදුරටත් ව්යාප්ත කිරීමේ අරමුණින් 2026 වසර සඳහා නව ව්යාපෘති දෙකක් හඳුන්වා දී තිබේ. කොළඹ, ගම්පහ සහ කළුතර යන දිස්ත්රික්ක කේන්ද්ර කරගනිමින් ක්රියාත්මක වන මෙම සංගමය, නව නායකත්වයක් යටතේ ජාතික මට්ටමේ දියුණුවක් ඇති කිරීමට මෙලෙස සූදානම් වෙයි.
දිවයින පුරා පාසල් වයස් නවක කණ්ඩායම් ශූරතාව
ජාතික මට්ටමේ මුල් පෙළේ ක්රීඩකයින් (Top 10) නොවන, දක්ෂතා දක්වන නවක පාසල් ක්රීඩකයින් දිරිගැන්වීම සඳහා මෙම දැවැන්ත තරගාවලිය සංවිධානය කර ඇත. 2026 ජූනි 13 සිට 21 දක්වා ගල්කිස්ස ශාන්ත තෝමස් විද්යාලයීය ක්රීඩාංගණයේදී සහ මර්කන්ටයිල් බැඩ්මින්ටන් ට්රස්ට් ක්රීඩාංගණයේදී මෙය පැවැත්වේ. වයස අවුරුදු 13, 15 සහ 17න් පහළ පිරිමි සහ ගැහැණු කාණ්ඩ යටතේ පැවැත්වෙන මෙහි ජයග්රාහකයින් සඳහා රුපියල් මිලියනයක මුදල් ත්යාග, කුසලාන සහ පදක්කම් පිරිනැමීමට නියමිතය.
උසස් පුහුණුකරු පුහුණු වැඩසටහන
ශ්රී ලංකා බැඩ්මින්ටන් මට්ටමේ 01 සහතිකය හිමි පුහුණුකරුවන් 40 දෙනෙකු වෙනුවෙන් ලෝක මට්ටමේ කොරියානු පුහුණුකරුවන්ගේ මෙහෙයවීමෙන් මෙම විශේෂ පුහුණු වැඩසටහන පැවැත්වේ. කෝට් උපක්රම (Court craft) සහ ක්රීඩා උපාය මාර්ග කෙරෙහි මෙහිදී විශේෂ අවධානය යොමු කෙරෙන අතර, වැඩසටහන ජූනි 22 සිට 27 දක්වා මර්කන්ටයිල් බැඩ්මින්ටන් ට්රස්ට් ශාලාවේදී අදියර දෙකක් යටතේ පැවැත්වීමට සැලසුම් කර ඇත.
මෙම වැඩසටහන් ද්විත්වයම දිවයින පුරා සිටින බැඩ්මින්ටන් ලෝලීන්ට විවෘත වන අතර, ඒ පිළිබඳ වැඩිදුර තොරතුරු සහ අයදුම්පත් සංගමයේ නිල ෆේස්බුක් පිටුව හරහා ලබාගත හැකිය.
