අලුත් අවුරුදු සමය ආසන්නයේ සහල් හිඟයක් ඇති විය හැකි බවට විපක්ෂයේ චෝදනා ප්රතික්ෂේප කරමින්, කෘෂිකර්ම, පශු සම්පත් සහ වාරිමාර්ග අමාත්ය කේ. ඩී. ලාල්කාන්ත මහතා ප්රකාශ කර ඇත්තේ, රජය විසින් සහල් සැපයුම ස්ථාවරව පවත්වා ගැනීම සඳහා අවශ්ය පියවර ගෙන ඇති බවයි.
මහනුවර දිස්ත්රික් සංවර්ධන කමිටු රැස්වීමකින් පසු මාධ්යවේදීන් සමඟ කතා කරමින් අමාත්යවරයා පෙන්වා දුන්නේ, අලුත් අවුරුදු සමයේදී සහල් මිල ඉහළ යාමක් හෝ හිඟයක් ඇති වීමට ඉඩ නොදෙන බවයි.
“අවුරුදු සමයේ සහල් හිඟයක් ඇති වෙනවා කියලා කියන්නේ විපක්ෂය සහ ඔවුන් වටේ ඉන්න පිරිසයි. අපි එහෙම කියන්නේ නැහැ. රජයත් එසේ පවසන්නේ නැහැ. සහල් හිඟයකින් තොරව සැපයුම සහතික කිරීමට රජය සතුව වැඩපිළිවෙළක් තිබෙනවා.
වී මිලදී ගැනීම සම්බන්ධයෙන් අදහස් දක්වමින් අමාත්යවරයා මෙසේ පැවසීය: “අපේ අරමුණ වුණේ ගොයම් කපන සමයේදී ගොවීන්ට සාධාරණ මිලක් ලබා දීමයි. 2024/2025 මාස් කන්නයේදී ගොවීන්ට හොඳ මිලක් ලැබුණා. ඒ සඳහා වී අලෙවි මණ්ඩලය උපාය මාර්ග සකස් කළා.
කිසිදු ගොවියෙකුගෙන් හෝ ගොවි සංවිධානයකින් ‘අඩු මිලට වී විකුණන්න වුණා’ කියන පැමිණිල්ලක් හෝ උද්ඝෝෂණයක් ආවේ නැහැ. දුක්ගැනවිලිත් නැහැ. ඒ අනුව ගත්තොත්, ගොවි ජනතාවගේ පැත්තෙන් ප්රශ්නය විසඳිලා තිබෙනවා. අපි ඒ ප්රශ්නය විසඳුවේ ඒක විසඳිය යුතු ආකාරයටමයි. වී විකුණාගන්න බැරිවුණා කියලා කිසිම චෝදනාවක් නැති එකෙන් පේන්නේ, අප ගත් ක්රියාමාර්ග සාර්ථක වුණා කියන එකයි.
සහල් මිල කළමනාකරණය කිරීමට අවශ්ය නම්, ඕනෑම මොහොතක විදේශයන්ගෙන් සහල් ගෙන්වනවා. වැඩි මිලට විකිණීමත් පාලනය කරනවා.
