ඇමෙරිකාවේ ලාස් වේගාස් නුවර ජේඩ් මවුන්ටන් කෝර්ට් (Jade Mountain Court) ප්රදේශයේ පිහිටි නිවසකදී, තම සහෝදරියට ඇයගේ පෙම්වතා විසින් අමානුෂික ලෙස පහර දෙන අයුරු සියැසින් දුටු ඇයගේ සහෝදරයා විසින් අදාළ පෙම්වතාට වෙඩි තබා ඝාතනය කර ඇති බව මෙට්රොපොලිටන් පොලිස් දෙපාර්තමේන්තුව වාර්තා කරයි. මෙම සිදුවීම පසුගිය මැයි 31 වන ඉරිදා අලුයම 5:00 ට පමණ සිදුව ඇති අතර, “මගේ මල්ලී මගේ පෙම්වතාට වෙඩි තිබ්බා” යනුවෙන් අදාළ කාන්තාව විසින්ම 911 හදිසි ඇමතුම් අංශයට දැනුම් දී තිබේ.
පොලිස් වාර්තාවලට අනුව, මෙම පෙම්වතා විසින් තම පෙම්වතියට දරුණු ලෙස පහර දෙමින් සිට ඇති අතර, එම ශබ්දය ඇසී උඩුමහලට ගිය ඇයගේ සහෝදරයා මෙය දැක තිබේ. එහිදී සහෝදරියට පහර දීම වහාම නවත්වන ලෙස ඔහු කිහිප වතාවක්ම දැඩි ලෙස අවවාද කර ඇතත්, පෙම්වතා එය නොතකා දිගින් දිගටම පහර දී ඇති බව විමර්ශනවලදී හෙළි වී ඇත. ඉන් අනතුරුව සිය සහෝදරියගේ ජීවිතය බේරා ගැනීම සඳහා ක්රියාත්මක වූ සහෝදරයා, තමන් සන්තකයේ තිබූ ගිනි අවියක් ඇද එම පුද්ගලයාට වෙඩි තබා තිබේ. පොලිස් නිලධාරීන් පැමිණ තුවාලකරුට වෛද්ය ප්රතිකාර ලබාදීමට උත්සාහ කළ ද ඔහු ඒ වන විටත් එම ස්ථානයේදීම මියගොස් සිටි බව පොලිස් ලුතිනන් රොබට් ප්රයිස් (Robert Price) මහතා ප්රකාශ කළේය.
කෙසේ වුවද, වෙඩි තැබීම සිදුකළ සහෝදරයාව පොලිස් භාරයට ගෙන තිබුණ ද, මේ දක්වා ඔහුට එරෙහිව කිසිදු අපරාධ චෝදනාවක් ගොනු කිරීමට පොලිසිය පියවර ගෙන නොමැත. මෙම සිදුවීම පිටුපස “ස්වයං ආරක්ෂාව” (Self-defense) සඳහා ක්රියා කිරීමේ මූලික ලක්ෂණ පවතින බැවින්, දිස්ත්රික් නීතිඥ කාර්යාලය (DA’s office) වෙත කරුණු වාර්තා කිරීමට පෙර මේ පිළිබඳව ඉතා පුළුල් සහ සවිස්තරාත්මක විමර්ශනයක් සිදුකළ යුතු බව ලුතිනන් ප්රයිස් වැඩිදුරටත් අවධාරණය කළේය. මෙම මියගිය පුද්ගලයා මීට පෙර ද අදාළ කාන්තාවට මෙලෙස පහර දී තිබේද යන්න සම්බන්ධයෙන් ද පොලිසිය මේ වන විට සොයා බලමින් සිටී.
