දෙවියන් වහන්සේගේ නාමයෙන් තවත් අයෙකුව නැසීමට හැකියාවක් නොමැති බව අති උතුම් මැල්කම් කාදිනල් රංජිත් හිමිපාණන් පවසයි. හිමිපාණන් මේ බව පැවසුවේ අද (28) පෙරවරුවේ පැවති ඉරුදින දේව මෙහෙය වෙත එක්වෙමින්.
පාස්කු ප්‍රහාරය සිදුව අදට දින 07 යි. රට තුළ පවතින තත්ත්වය හේතුවෙන් සියලු දේවස්ථානවල දේව මෙහෙයන් නොපැවැත්වුණ අතර මෙම විශේෂ දේව මෙහෙය කොළඹ අගරදගුරු නිල නිවසේ සිට පවත්වනු ලැබුවේය.
මෙම අවස්ථාවට ජනාධිපති මෛත්‍රීපාල සිරිසේන, අග්‍රාමාත්‍ය රනිල් වික්‍රමසිංහ සහ විපක්ෂ නායක මහින්ද රාජපක්ෂද පැමිණි අතර, ඔවුන් පාස්කු ඉරිදා ප්‍රහාරයෙන් මියගිය පිරිස් සිහිකරමින් ඉටි පහන් දැල්වීමටද එක්වුණා.
ආරක්ෂක තත්වය සැලකිල්ලට ගනිමින් ඉරුදින දේව මෙහෙයන් අද දේවස්ථානවල නොපැවති අතර කාදිනල් හිමිපාණන්ගේ ප්‍රධානත්වයෙන් පැවති දේවමෙහෙය සියලුම රූපවාහිනී නාලිකා ඔස්සේ සජීවීව විකාශය කෙරුණේය.
