එක්සත් ජාතික පක්ෂ නියෝජ්ය නායක සජිත් ප්රේමදාස මහතා පිළිගැනීමේ විශේෂ ජනතා රැළිය අද (12) බදුල්ල විල්ස් පාර්ක් පිටියේදී ආරම්භ වුයේ අමාත්ය හරින් ප්රනාන්දුගේ ප්රධානත්වයෙන්. මෙම උත්සවයට විශාල ජනතාවක් පැමිණ සිටියේය.
මේ අතර එක්සත් ජාතික පක්ෂ සභාපති කබීර් හෂිම් මහතා මාධ්ය වෙත නිවේදනයක් නිකුත් කරමින් කියා සිටියේ තම පක්ෂයේ ජනාධිපති අපේක්ෂකයා නුදුරේදී ජනතාව හමුවේ ප්රකාශයට පත් කරන බවයි. එම නිවේදනය පහත පරිදි සම්පුර්ණයෙන්.
මාධ්ය නිවේදනයි
‘‘එක්සත් ජනතා නිදහස් සන්ධානය” නියෝජනය කරමින් පාර්ලිමේන්තුවට තේරී පත්ව එහි මන්ත්රී ධුරයක් හොබවන හිටපු ජනාධිපති මහින්ද රාජපක්ෂ මහතා, “ශ්රී ලංකා නිදහස් පක්ෂයේ” සමාජිකත්වය දරමින්ම ‘‘ශ්රී ලංකා පොදුජන පෙරමුණ” නමින් තම සහෝදරයන් හා එක්ව නව දේශපාලන පක්ෂයක් පිහිටුවා ඊයේ දිනයේදී එහි නායකත්වයට පත්විය. පක්ෂයේ ව්යවස්ථාව උල්ලංඝනය කරමින් මෙලෙස ක්රියාකරන මහින්ද රාජපක්ෂ රටේ නීතියේ ආදිපත්ය සුරකිනු ඇතැයි කෙලෙස විශ්වාස කරමුද? එසේම චෝදනා රැසකට අධිකරණය හමුවේ විත්තිකරුවකුව සිටින ඇමරිකානු පුරවැසි තම සහෝදරයාව නව පක්ෂයේ ජනාධිපති අපේක්ෂකයා ලෙස රටෙහි නීතියට පටහැනිව, ජනතාව නොමග යවමින් නම් කිරිමටද ක්රියා කර ඇත.
ශ්රී ලංකාවේ පැරණිතම දේශපාලන පක්ෂයක් වන “එක්සත් ජාතික පක්ෂය” තම ජනාධිපති අපේක්ෂකයාව නුදුරේදීම ප්රජාතන්ත්රවාදී ආකාරයෙන් තෝරා පත්කර ගෙන ජනතාව හමුවේ ප්රකාශයට පත් කිරිමට සියලු කටයුතු සූදානම් කර ඇත. පක්ෂයේ එකගත්වයෙන් යුතුව එම කටයුතු නුදුරු දිනකදීම සිදු කෙරේ.
අප විසින් ඉදිරිපත් කරනු ලබන්නේ අප මාතෘභූමියට ආදරය කරන ප්රජාතන්ත්රවාදී නායකයෙකි. එසේම අප පක්ෂය ජනාධිපතිවරණයට ඉදිරිපත් කරන අපේක්ෂකයා කිසිවිටකත් අධිකරණය හමුවේ හෝ ජනතාව ඉදිරියේ චෝදනා ලැබූවෙකු නොවනු ඇත. අප පක්ෂයක් වශයෙන් ඉදිරි ජනාධිපතිවරණයට ඉදිරිපත් කරන්නේ රටේ සියලු පුරවැසියන්ට එකසේ ගෞරව කරන, සියලු ආගම් සහ ජාතීන් පිළිගන්නා නායකයෙකි. ඔහු රටේ ජාතික ආරක්ෂාව තහවුරු කල හැකි පෞරුෂයකින් හෙබි පුද්ගලයකු වනු ඇත. අපගේ ඉදිරි ජනාධිපතිවරණ අපේක්ෂකයා අනාගත පරපුර නව ලෝකයට ගෙන යා හැකි, දුප්පතාගේ දුක හදුනන, උගත් පුද්ගලයකු වන අතර, රටේ නීතියට ගරු කරන එය නොබිදින පුද්ගලයෙකු වනු ඇතැයි ප්රකාශ කරමි.
කබීර් හෂීම්
සභාපති – එක්සත් ජාතික පක්ෂය
මහාමාර්ග හා මාර්ග සංවර්ධන සහ ඛනිජ තෙල් සම්පත් සංවර්ධන අමාත්ය
