කැනඩාවේ මාර්කම් ප්රදේශයේ නිවසක සිදු වූ වෙඩි තැබීමකින් එම නිවසේ සිටි යාපනයේ පදිංචි 20 හැවිරිදි තරුණියක පසුගිය 9 දා මියගොස් තිබෙනවා.
මෙසේ වෙඩි තැබීමෙන් මියගොස් ඇත්තේ යාපනයේ හිටපු නගරාධිපතිවරයකු වූ ඇල්ෆ්රඩ් දොරේඅප්පාගේ මිණිබිරියකයි.
ඇය නමින් රගුදාස් නිලක්ෂි යි. මෙම නිවස කැනඩාවේ මාර්කම් නගරයේ කාසල්මෝර් මාවතේ පිහිටා තිබෙනවා. යාපනයේ කොණ්ඩාවිල් ප්රදේශයේ සිට කැනඩාවට ගිය තරුණිය වසර දෙකක්ම ජීවත් වී ඇත්තේ එම නිවසේ.
එම නිවසට මීට පෙර අවස්ථා දෙකකදීම වෙඩි තැබීම් සිදුව ඇති අතර මෙවර වෙඩි තැබීමෙන් යාපනයේ පදිංචි තරුණිය සමග තවත් අයකු මියගොස් තවත් අයකුට තුවාල ලබා තිබෙනවා.
තුවක්කුකරුවන් විසින් නිවසේ ආරක්ෂාවට සිටි සුනඛයකු ද වෙඩි තබා මරා දමා තිබෙන බව විදෙස් වාර්තා සදහන් කර තිබෙනවා.
වෙඩි තැබීමෙන් පසුව ඊට සම්බන්ධ හතරදෙනකු නවීන පන්නයේ කැබ් රථයකින් පලා යන අයුරු සී.සී.ටී.වී කැමරා පද්ධතියක සටහන් වී ඇති බව කැනේඩියානු පොලිසිය සඳහන් කර තිබෙනවා.
මේ දක්වාම කිසිදු සැකකරුවකු අත්අඩංගුවට ගෙන නොමැති අතර කැනඩාවේ පොලීසිය මේ වන විටත් පරීක්ෂණ සිදු කරමින් පවතිනවා.
ඇල්ෆඩ් දොරෝ අප්පා ගැන මේ සිද්ධිය හමුවේ නැවත කතා බස් වනවා. ඔහු මිය ගොස් ඇත්තේ 1975 ජුලි 27 වනදායි. යාපනය, පොන්නාලෙයි කෝවිලට ගොස් දෙවියන්ගේ ආශිර්වාදය ලබා ගෙන සිය මෝටර් රථයෙන් ආපසු නිවෙස බලා ඒමට ගිය අවස්ථාවේදී එම කෝවිල ඉදිරිපිටදිම දොරේ අප්පා ඝාතනයට ලක් වුණා.
මෙය එල් ටීටී ඊ සංවිධානය විසින් සිදු කෙරෙුණු පළමු දේශපාලන ඝාතනය ලෙස හදුන්වනවා.
