රක්ෂිත බන්ධනාගාර ගත කරන ඕනෑම රැඳවියකු ඊට ඇතුළු කරගැනීමට පෙර නිරුවත් කර සෝදිසි කිරීමකට ලක් කරන බව නීතිඥ චානක අභයවික්රම මහතා සඳහන් කරනවා.
ඒ අනුව එම කාර්යය රක්ෂිත බන්ධනාගාර ගත කරන ලද පොලිස්පති දේශබන්දු තෙන්නකෝන්ටද සිදු කරන්නට ඇති බව ඔහු පවසනවා.
අනෙක් රැුදවියන් හා සමානව අවම පහසුකම් බන්ධනාගාරය තුළදී ඔහුට හිමිවනු ඇති බවත් සිර දඬුවම් නියම වූ සිරකරුවන්ට අදින්න්ට නියම වන ජම්පරය ඇදීමේ අවශ්යතාවක් නැති බවත් ඔහු කියා සිටියා.
සිමෙන්ති පොළොවේ නිදාගැනීමට සිදුවුණු ඇති බවත් පැවසූ ඔහු වෛද්යවරුගේ නිර්දේශයක් මත පැදුරක් හෝ මෙට්ටයක් ලබා ගැනීමට හැකියාව ඇති බවද සඳහන් කර සිටියා.
නමුත් පිටතින් ආහාර ලබා ගැනීමේ හැකියාව ඇති බවත් ඖෂධ හෝ වෙනත් සෞඛ්යමය අවශ්යතා වෛද්යවරුන් නිර්දේශ මත හිමි වනු ඇති බවද කියා සිටීයි.
කෙසේ වෙතත් රක්ෂිත බන්ධනාගාරගත කෙරුණු සේවය අත්හිටුවා තිබෙන පොලිස්පති දේශබන්දු තෙන්නකෝන් මහතා අඟුණකොළපැලැස්ස බන්ධනාගාරය තුළ ගත කළ පළමු දිනයේ ආහාර ගැනීම පවා ප්රතික්ෂේප කර ඇති බව පුවතක් වාර්තා වනවා.
මේ අතර ඔහු දැඩි ලෙස මානසිකව කඩා වැටී ඇති බවත්, කිසිවෙකු සමග කතා නොකර ඇති බව ද එහි සඳහන්.
එසේම වැලිගම පැලෑන ප්රදේශයේ සිදු වූ වෙඩි තබා ගැනීමෙන් පොලිස් නිලධාරියකු මිය යෑමේ සිද්ධිය සම්බන්ධයෙන් රක්ෂිත බන්ධනාගාරගත කර සිටින සැකකාර පොලිස්පති දේශබන්දු තෙන්නකෝන් මහතාට ඇප ලබා දෙන ලෙස විත්තියේ නීතිඥවරු කළ ඇප ඉල්ලීමක් ප්රතික්ෂේප කළ මාතර මහේස්ත්රාත් අරුණ බුද්ධදාස මහතා සැකකරු ලබන 03 වැනිදා තෙක් තවදුරටත් රක්ෂිත බන්ධනාගාරගත කිරීමට ඊයේ (20) නියෝග කළා.
සැකකරු, දැඩි ආරක්ෂාවක් යටතේ බන්ධනාගාරයේ වෙනම ආරක්ෂක ස්ථානයක රඳවා තබන ලෙසට ද මහේස්ත්රාත්වරයා බන්ධනාගාරයට නියෝග කළා.
අධිකරණ කටයුතු අවසන්වීමෙන් පසුව බන්ධනාගාර නිලධාරීන් බන්ධනාගාර බස් රථය මඟින් සැකකාර පොලිස්පති දේශබන්දු තෙන්නකෝන් මහතා දුම්බර සිර මැදිරිය වෙත රැගෙන යනු ලැබුවා.
