අධික හිරු රශ්මිය හමුවේ ශරීරයට ඇති වන බලපෑම් සූර්යතාපයට පමණක් සීමා නොවන බවත්, ඒ ආශ්රිතව තවත් බරපතල සෞඛ්ය ගැටලු රැසක් නිර්මාණය වන බවත් වෛද්යවරු අනතුරු අඟවති. විශේෂයෙන්ම බෝවන රෝග මෙන්ම නිදන්ගත රෝගී තත්ත්වයන් උත්සන්න වීමේ ඉහළ ප්රවණතාවක් පවතින බව පර්යේෂණ මගින් හඳුනාගෙන ඇත.
දැඩි රශ්මයත් සමඟ හිසරදය, මිග්රේන්, විවිධ අසාත්මිකතා, මුත්රා මාර්ගයේ ආසාදන සහ නින්ද නොයාම වැනි සංකූලතා බහුලව දක්නට ලැබේ. චර්ම රෝග, ඇස් රෝග මෙන්ම පැපොල සහ කම්මුල්ගාය වැනි බෝවන රෝග පැතිර යාමේ අවදානමක් පවතී. දැඩි රශ්මය පවතින කාලවලදී ආඝාතය (Stroke) වැළඳීමේ අවදානම සියයට 3.8කින් පමණ ඉහළ යන බව පර්යේෂණ දත්ත පෙන්වා දෙයි. අධික උෂ්ණත්වය නිසා මොළයට සහ මධ්ය ස්නායු පද්ධතියට හානි සිදු වී සිහි විසඥ වීම පවා සිදුවිය හැකිය.
දියවැඩියාව, අධික රුධිර පීඩනය සහ හෘද රෝගවලින් පෙළෙන පුද්ගලයන්ගේ සෞඛ්ය තත්ත්වය මෙවැනි කාලවලදී පිරිහීමට ලක්විය හැකි බැවින් ඔවුන් වඩාත් ප්රවේශම් විය යුතුය. විජලනය හේතුවෙන් රුධිරයේ ග්ලුකෝස් මට්ටම ඉහළ යා හැකි අතර එය දියවැඩියා රෝගීන්ගේ සීනි මට්ටම පාලනය කිරීමට බාධා පමුණුවයි. අධික උෂ්ණත්වය ඉන්සියුලින් වැනි ඖෂධවල සහ රුධිරයේ සීනි පරීක්ෂා කරන උපකරණවල ක්රියාකාරිත්වයට අහිතකර ලෙස බලපෑ හැකි බැවින් ඒවා සිසිල් ස්ථානවල ගබඩා කළ යුතුය.
පිපාසය දැනුණද නොදැනුණද ප්රමාණවත් පරිදි ජලය පානය කිරීම අත්යවශ්ය වේ. කැෆේන් හෝ සෝඩියම් අධික ලෙස අඩංගු කෝපි, තේ සහ මධ්යසාර වැනි පාන වර්ගවලින් වැළකී සිටීම සෞඛ්යාරක්ෂිතය. මිග්රේන් රෝගීන් සෘජුව හිරු රශ්මියට නිරාවරණය වීමෙන් වැළකිය යුතු අතර පිටතට යන විට කුඩයක් භාවිත කළ යුතුය. හිරු රශ්මියට නිරාවරණය වීමෙන් පසු ඇති වන රෝග ලක්ෂණ සතියකට වඩා පවතින්නේ නම් වහාම වෛද්ය උපදෙස් ලබාගත යුතුය.
