මාතෘ හා ළමා සෞඛ්ය සේවාවේ ගුණාත්මකභාවය ඉහළ නැංවීම සඳහා සෞඛ්ය කාර්ය මණ්ඩල සවිබලගැන්වීමේ අරමුණින් සංවිධානය කරන ලද නිපුණතා සංවර්ධන වැඩමුළු මාලාවක පළමු වැඩසටහන සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් කළුතර ගල්ලස්ස ළමා හා මාතෘ රෝහලේදී පැවැත්වුණා.
මව්වරුන්ට සහ අලුත උපන් බිළිඳුන්ට ප්රශස්ත සත්කාර ලබාදීම ශක්තිමත් කිරීම මෙන්ම සෞඛ්ය කාර්ය මණ්ඩලයේ දැනුම සහ කුසලතා ප්රවර්ධනය කිරීම මෙහි ප්රධාන අරමුණයි. ශ්රී ලංකා පරිජන්ම සංගමය (Perinatal Society of Sri Lanka), කළුතර ළමා හා මාතෘ රෝහල, ජාතික සෞඛ්ය විද්යායතනය සහ කළුතර ප්රාදේශීය සෞඛ්ය සේවා අධ්යක්ෂ කාර්යාලය එක්ව මෙය සංවිධානය කර තිබුණා. මෙම වැඩමුළු මාලාව දීප ව්යාප්තව ක්රියාත්මක කිරීමට සැලසුම් කර ඇත.
වෛද්ය නිලධාරීන්, හෙදියන් සහ පවුල් සෞඛ්ය සේවිකාවන් සඳහා මෙම පුහුණුව ලබාදෙනු ලබයි. මාතෘ මරණ අවම කිරීමේදී ක්ෂේත්ර කාර්ය මණ්ඩලයේ කාර්යභාරය, අලුත උපන් බිළිඳුන්ගේ අනතුරුදායක සංඥා සහ ප්රසව කාලයට පෙර මාතෘ අවදානම් කළමනාකරණය වැනි මාතෘකා යටතේ මෙහිදී දේශන සහ පුහුණුව පැවැත්විණි.
සෞඛ්ය සේවාවේ සේවා ධාරිතාව ඉහළ නැංවීමට මෙවැනි පුහුණු වැඩසටහන් ප්රධාන අවශ්යතාවක් බව අමාත්යවරයා පෙන්වා දුන්නා. ප්රධාන රෝහල් සහ පර්යන්ත ආයතන අතර පරතරය අඩු කර ගුණාත්මක සත්කාර සෑම මවකටම සහ දරුවෙකුටම ලබාදීම සහතික කරන බව ඔහු අවධාරණය කළා. එමෙන්ම රෝහල් කාර්ය මණ්ඩල පුරප්පාඩු සපුරාලීම සඳහා සැලසුම්ගත වැඩපිළිවෙළක් ක්රියාත්මක වන අතර බඳවා ගැනීම් කඩිනම් කිරීමට කටයුතු කරන බවද අමාත්යවරයා වැඩිදුරටත් සඳන් කළා.
මෙම අවස්ථාවට කළුතර ප්රාදේශීය සෞඛ්ය සේවා අධ්යක්ෂ නවීන් ද සොයිසා සහ ශ්රී ලංකා පරිජන්ම සංගමයේ සභාපතිනී මහාචාර්ය රුවන්ති පෙරේරා ඇතුළු සෞඛ්ය ක්ෂේත්රයේ නිලධාරීන් පිරිසක් සහභාගී වූහ.
