පළාත් පාලන මැතිවරණය කල් දැමීම ජනතාවගේ මූලික අයිතිවාසිකම් කඩකිරීමක් බව ශ්රේෂ්ඨාධිකරණය පෙන්වා දුන්නද, ජනතාවගේ ජිවත්වීමේ අයිතිය සුරක්ෂිත කිරීම වෙනුවෙන් එම කාලය කැප කිරීම නිසා එම මැතිවරණ පැවැත්වීමට නොහැකි වීම පිළිබඳ තමා කණගාටු නොවන බවත්, ජනතාවගේ ඡන්ද අයිතියට මෙන්ම ජීවත්වීමේ අයිතියටද තමා ගරු කරන බවත් ජනාධිපති රනිල් වික්රමසිංහ මහතා පැවසීය.
රටේ ආර්ථිකය ස්ථාවර මට්ටමකට ගෙන ඒමේ වැඩපිළිවෙළේදී සෑම පැයකටම වටිනාකමක් හිමි වූ බව පෙන්වා දුන් ජනාධිපතිවරයා පළාත් පාලන මැතිවරණය පැවැත්වීම වෙනුවෙන් එම කාලය වැය කළා නම් අද රටේ ආර්ථිකය ස්ථාවර මට්ටමකට ගෙන ඒමට නොහැකි වන බවද සඳහන් කළේය.
ජනාධිපතිවරයා මේ බව සඳහන් කර සිටියේ ඊයේ (22) පස්වරුවේ මහරගම තරුණ සේවා සභා ශ්රවණාගාරයේ පැවති නව ජනතා පෙරමුණ පක්ෂයේ ජාතික සම්මේලනය අමතමිනි.
මෙහිදී වැඩිදුරටත් අදහස් දැක්වූ ජනාධිති රනිල් වික්රමසිංහ මහතා මෙසේද පැවසීය.
“දේශපාලන වශයෙන් අප මේ වන විට නව යුගයකට පැමිණ තිබෙනවා. එම යුගය අප කණ්ඩායම විසින් නිර්මාණය කරන ලද්දක් බව කිවයුතුයි. මේ රටේ ආර්ථිකය කඩා වැටුණු අවස්ථාවේදි එම ආර්ථිකය ගොඩගැනීමට සාම්ප්රදායික නායකයින් ඉදිරිපත් නොවු අවස්ථාවක අප කණඩායම එකතුවී එම වගකීම භාරගත්තා.
