පාස්කු ත්‍රස්තයන් එක්ක අපිට ඩීල් නැහැ – විපක්ෂනායක සජිත්
මෙතෙක් කල් බිහි වූ ආණ්ඩු ජනතාව, රවටමින් තනතුරට පත් වු පසු මෙයට සාධාරණයක් ඉටු නොකරමින් මෙහි සැබෑ මොලකරුවන් රකින ක්‍රියාපිළිවෙතක යොමු වුවත් සමගි ජන බලවේග රජයක් තුළ සිමා මායිම් තරාතිරම් නොබලා මෙම මිලේච්ඡ ප්රහාරය සිදු කල අයට දඩුවම් ලබා දෙන බව විපක්ෂ නායක සජිත් ප්‍රේමදාස මහතා පවසයි.
විපක්ෂනායකවරයා මේ බව පැවසුවේ පාස්කු ප්‍රහාරයට වසර 5ක් සැපිරිම නිමිත්තෙන් සමගි ජන බලවේගයේ කතෝලික කමිටුව කොළඹ ශාන්ත මරියා වැඩිහිටි නිවාසයේ සංවිධානය කර තිබූ දානමය පුන්‍යකර්මයක් සඳහා එක්වෙමිනි.
මීට වසර 5කට පෙර මිලේච්ඡ ත්‍රස්තවාදීන් මෙරට දේවස්ථානය සහ හෝටල් ගණනාවක් ඉලක්ක කර ගෙන සිදු කල මිලේච්ඡ ත්‍රස්ත ප්‍රහාරයෙන් මෙරට කතෝලික භක්තිකයන් ඇතුළු සාමාන්‍ය ජනතාවට ජීවිත, අත්පා අහිමි වීම් සිදු වූ බවත් වසර 5ක් ගත වී ඇතත් මෙම ප්‍රහාරයට අදාළ සත්‍ය තොරතුරු මහමොළකරුවන්, මෙය පිටුපස කටයුතු කළ පුද්ගලයන් හා කණ්ඩායම් සම්බන්ධ සත්‍ය හෙළිදරව් නොවූ බවත් විපක්ෂ නායකවරයා පැවසීය.
පාස්කු ප්‍රහාරයෙන් පසුව මෙරට මෙතෙක් බිහි වූ සැම නායකයකුම මෙහි සත්‍ය සොයා දෙන බවට පොරොන්දු වූ බවත් ගත හැකි උපරිම ක්රියාමාර්ග ගන්නා බව පැවසුවත් මිනිසුන්ගේ ඡන්දය ගැනීමට පමණක් ඔවුන් එම පොරොන්දු සිදු කළත් ඉන්පසුව මිනිසුන් මංමුලා කරමින් සත්‍ය වසන් කළ බව හෙතෙම කියා සිටියේය.
එවන් පරිසරයක් තුළ කුමන ආකාරයකින්වත් මේ මිලේච්ඡ ප්‍රහාරයට සම්බන්ධ කිසිම අයකු ඉන් ගලවා ගැනීමට තමා කටයුතු නොකරන බවත් ස්වාධීන අපක්ෂපාතී පරීක්ෂණයක් පවත්වා මේ ත්‍රස්තවාදී ප්රහාරය සැලසුම් කළ මහමොළකරුවන් හා කණ්ඩායම් නීතිය හමුවට ගෙනවිත් මොවුන්ට විරුද්ධව උපරිම දඩුවම් ලබා දෙන බවත් විපක්ෂ නායක සජිත් ප්‍රේමදාස මහතා පැවසීය.
තමා මේ වන විටත් අගරදගුරු අතිඋතුම් කාදිනල්තුමා ප්‍රමුඛ කතෝලික සභාවට, කතෝලික පියතුමන්ලාට සහ රටේ ජනතාවට පොරොන්දු වී සිටින්නේ මෙම මිලේච්ඡ ප්‍රහාරයට නීතිය හමුවේ ලබා දිය හැකි උපරිම දඩුවම් ලබා දෙන බවත් මේ පිටුලස ඇති බලවේග නීතිය හමුවට ගෙන එන බවත් තමන්ගේ තනතුරු තාන්න මාන්න ආරක්ෂා කර ගැනීමට මේ වින්දිතයන් පාවා නෙදෙන බවත් විපක්ෂ නායකවරයා මෙහි දී පොරොන්දු විය.
එසේම මෙතෙක් කල් බිහි වූ ආණ්ඩු ජනතාව, කතෝලික ප්‍රජාව සහ කාදිනල් තුමා රවටමින් තනතුරට පත් වු පසු මෙයට සාධාරණයක් ඉටු නොකරමින් මෙහි සැබෑ මොලකරුවන් රකින ක්‍රියාපිළිවෙතක යොමු වුවත් සමගි ජන බලවේග රජයක් තුළ සිමා මායිම් තරාතිරම් නොබලා මෙම මිලේච්ඡ ප්රහාරය සිදු කල අයට දඩුවම් ලබා දෙන බවත් මේ පාස්කු ප්රහාරයේ මහ මොලකරුවන් සමග සජිත් ප්‍රේමදාස වන තමා ඩීල් නොදමන බවත් තරාතිරම නොබලා දඩුවම් ලබා දෙන බවත් විපක්ෂ නායක සජිත් ප්‍රේමදාස මහතා මෙහි දී වැඩිදුරටත් පැවසීය.
